CYMA hruaitute leh Chief Minister inkâwm

Central YMA office bearer-te chuan nimin chawhma lam khan chief minister Lal Thanhawla a pisaah an kâwm a, thil chi hrang hrang an sawipui.

CYMA hruaitute chuan, Ratu-a YMA General Con­ference-in Mizoramah paper mill din a nih theih nana sorkara thlen an rel thu an sawipui a; CM Lal Thanhawla chuan, sorkar pawhin paper mill din a nih theih nan hma a lak mek thu a lo hrilh. YMA General Conference-a thurel dang, drugs license pek chhuah dawnah a diltute awmna branch YMA hriatpuina lehkha thil tel ve an duh thu an thlen bawk.

Central YMA OB-te chuan, Mizoramah judiciary chak leh ṭha zawka kalpui an duh thu te, Aizawlah car parking-cum-auditorium sak a nih theih nan priority list-a telh ve ṭha an tih thute leh, Environment & Forest department nena thawh dunna fire prevention awareness campaign, YMA sub-Hqrs. leh group-te'n an kalpui zel dan turte an sawipui bawk.

Central YMA hruaitute thu thlente hi a lo bawhzui tur thu chief minister Lal Thanhawla chuan a sawi tih CYMA thuchhuah chuan a tarlang.