Police-in 2014-ah thubuai 2,825 ziak lut Tualthah thubuai 45 ziah luh a ni
Mizoram police-te chuan January-December 2014 chhung khan thil chi hrang hrang 43 velah thubuai 2,825 an ziak lut a, chung zinga 45 chu tualthah thubuai a ni.
CID (Crime) chhinchhiah danin, kum 2014 chhung khan thla tin tualthah thubuai ziah luh a ni a; ziah luh tam ber thla chu March leh June thla niin, thubuai pasarih ve ve ziah luh a ni.
Tualthah thubuai hi May-ah panga, February, August leh September-ah pali, January leh July-ah pathum leh, April, October, November leh December-ahte thubuai pahnih ṭheuh ziah luh a ni.
Tualthah thubuai bakah hian tualthah tum chungchangah thubuai 23 ziah luh a ni a, April tih lohah chuan tualthah tum thubuai hi thla tin an ziak lut.
Kum 2014 chhunga thubuai ziah luh hnem ber chu rûkrûk thubuai a ni a, thubuai 889 ziah luh a ni. Thubuai ziah luh tlemna ber chu mahni intihhlum tum chungchangah leh khawlaia intihbuaiah a ni a, thubuai pahnih ve ve ziah luh a ni.
Mizoram police-te chuan kum 2014 chhung khan Arms Act hnuaiah thubuai 29, Explosive Substance Act hnuaiah thubuai 22, Information Technology Act hnuaiah thubuai 22, MLTP Act hnuaiah thubuai 248, ND&PS Act hnuaiah thubuai 97 leh Foreigner Act hnuaiah thubuai panga an ziak lut bawk.