Sum awm lo vangin HIV/AIDS dona a ṭhuanawp

HIV/AIDS dona kawnga thawktu pawl (NGO)-te chuan thla nga chhung sorkar aṭangin ṭanpuina an hmu tawh lo a, hei vang hian HIV/AIDS dona kawngah hma an la chhunzawm thei lo. NGO hruaitute chuan, sum harsatna vang hian Mizo­ramah HIV a pun nasat phah an hlauhthawn thu an sawi.

Federation of NGO Working in Drugs and AIDS Prevention and Care (FONWIDAPAC) president John Thansanga'n Vang­laini palai zawhna chhanga a sawi danin, HIV/AIDS dona kawnga hna thawktu NGO-te hian Mizoram State AIDS Control Society (MSACS) aṭangin ṭanpuina sum an hmu ṭhin a, mahse September 2014 aṭanga tun thlengin sum an la hmu leh lo.

John Thansanga sawi danin, FONWIDAPAC-ah hian NGO 41 an tel a, chung zinga 30 chuang hretin HIV/AIDS dona kawngah hna an thawk a; sorkar (MSACS) aṭanga sum an hmuh chu hna an thawh theih chhan pawimawh ber pakhat a ni.

NGO-te hian office-te an nei a, an zinga ṭhenkhat chuan drop-in centre an din. Drop-in centre-ah chuan ruihhlo ngai, damdawia inchiu lo thei lote'n hriau thianghlim an hman theih nan a thlawnin hriaute an pe ṭhin a, harsatna neite a ṭul angin an ṭanpui ṭhin. A mamawhte hnenah condom an pe a, HIV/AIDS veite an enkawl a; HIV/AIDS awareness campaign an nei ṭhin bawk.

NGO hrang hrangte hian an centre/office-te la hawng ve bawk mah se, HIV/AIDS dona hna an thawk tak tak thei tawh lo a, NGO ṭhenkhat phei chu an inkhâr rih tih an sawi.

John Thansanga chuan, sorkar aṭanga pawisa an hmuh loh hnuah loan-te lain a theih ang angin ṭan an la a, mahse tunah chuan hna an thawk thei tawh lo tih a sawi a, "Syringe leh condom-te kan pe chhuak thei tawh lo a, hei hi nasa takin kan tuar ngeiin a rinawm," a ti.

FONWIDAPAC President chuan, NGO-te chuan HIV/AIDS donaa an thawhnaah, thawktu an ruai ve nual a, mahse chu'ng an thawktu rawihte pawh chu thla nga chhung hlawh an pe thei tawh lo tih a sawi a, "Centre/office atana mi in luah man kan pe thei lo a, in neitute lamin chhuak mai turin min nawr ṭan a, kan mangang hle tawh a ni," a ti.

HIV/AIDS dona kawnga hma latu, SHALOM-a an hotu, Dr Chawnglungmuana chuan, MSACS aṭanga sum an hmuh theih loh chhan chu, Mizoram sorkarin Central aṭanga MSACS sum tur lo kal a pek chhuah ṭhat loh vang a nih thu Vanglaini palai a hrilh.

Dr Chawnglungmuana chuan, "Sum harsatna avangin Mizoram sorkarin Treasury-te ni khatah cheng nuai 20 bak an pek chhuah a phal si lo a, a buaithlak hle a ni," a ti. Central lamah cheng nuai 820 a tâng mek a, chu chu Central lamin tuna sum awm sa hman zawh a nih loh chuan a pek chhuah theih loh thu leh, sorkar aṭanga sum hmuh mai beiseina an neih rih loh thu a sawi bawk.

FONWIDAPAC hruaitute sawi danin NGO-te'n hna an thawh mumal theih tawh loh avang hian Mizoramah HIV vei an pun phah ngei a rinawm a, "Tunah lang chhuak rih loh mah se, tun aṭanga thla thum velah chuan a nghawng kan hmu ngeiin a rinawm," an ti.