Aizawlah ISAPM Convention tan a ni

Nimin khan College of Veterinary Sciences and Animal Husbandary, Central Agricultural University, Selesihah Indian Society of Animal Production and Management (ISAPM) convention ṭan a ni a, AH&Vety minister C Ngunlianchunga'n a hmanpui.

C Ngunlianchunga chuan ranvulhtute’n harsatna an tawh ṭhin chingfel tura science thiamna hmanga ṭanpui dan tur zawnna hun ṭha siam a ni chu lawmawm a tih thu sawiin, "Ei leh bara intodelhna turin science thiamna nei ve lem lo farmer-te’n an thawh hlawk hle. India rama cheng mipui zinga a zat ve aia tam chu lo neih leh ranvulha eizawng an ni a, an dinhmun chawikanna tur hun remchang siamsak a pawimawh hle a ni," a ti.

Minister chuan state hrang hrang aṭanga scientist kalkhawm­te chu convention leh seminar an hman chhungin ranvulhtute tana chhawrnahawm tur thil thar ngaihtuah chhuak turin a chah.

Covention kaihruaitu Central Agriculture University, Imphal-a vice chancellor (acting) prof. M Premjit Singh chuan India ram mipuite, a bik takin hmarchhak biala cheng te’n ei leh bar hnianghnar an dawn theihna tur a ranvulh pawimawhzia sawiin, "Convention hmang tura lo kal mithiam tak takte’n ram pum huapa ranvulh lama hma kan sawn theihna tur ngaihtuah a, finchhuah tur leh an thil rawt chhuahte chu ramin a mamawh ang zela sorkar nena tang tlanga hma lak zui a ṭul a ni," a ti.

Convention-ah hian ‘Livestock Production Practices for Small Farmers of Marginalised Groups and Communities in India’ tih thupui hmangin seminar neih nghal a ni.

January 30 thleng awh tur Indian Society of Animal Production and Management (ISAPM) convention-ah hian India ram hmun hrang hrang aṭangin mi­thiam 100 chuang an tel a ni.