News Lawrkhawm
PMEGP workshop
Nimin khan Aizawla Chanmari YMA Hall-ah PMEGP state level workshop neih a ni a, Industries minister H Rohluna'n a hmanpui. Minister H Rohluna chuan, PMEGP hnuaia Mizoram tana sorkar laipuiin sum a dah chu hman zawh a ni ngai lo tih a sawi a; sorkar kum kal meka Small & Medium Enterprise Ministry-in cheng vbc. 12 Mizoram tana a rawn pek pawh quarter hnuhnung ber thlengin margin money hman tawh zat chu cheng nuai 250 vel chauh a nih thu a sawi. Workshop-ah hian PMEGP hmang ṭangkaitute'n thu an sawi bawk a ni.
Ganja man
Champhai police-te chuan nimin khan Khankawn checkgate-ah ganja kg. 50 an man a, a kengtu mi pahnih pawh an man nghal a, thu an zawtfiah mek a ni.
NLUP sem
Nimin khan Industry department, Kolasib hnuaia NLUP thlangtu mi 222 hnenah nimin khan ṭanpuina sum Rs. 65,36,500 sem a ni. NLUP semtu Kolasib addl. DC Lalfela Sailo chuan NLUP dawngtute chu an pawisa dawnte ṭangkai taka hmang a, dinchhuahpui ngei tum turin a fuih. Nimin vek khan Champhai district-a East Tuipui cluster chhunga Industries department hnuaia NLUP thlangtu chhungkaw 78-te hnenah ṭanpuina sum sem a ni. Champhaiah pawh District AH & Vety office-ah Champhai khawpui chhunga veng parukah NLUP hnuaia ar vulh thlangtu mi 100-te hnenah ar note 50 leh a chaw man tur Rs. 8,000 ṭheuh pek an ni.
Apex Bank meeting
Mizoram Co Operative Apex Bank Limited Executive Committee chu nimin khan an office-ah an ṭhukhawm. Meeting hi an chairman T Lalmuanpuii'n kaihruaiin, sum puk tur atan cheng nuai 517.27 an ruahman.