ASHA hnuaia thawkte tan training

National Health Mission (NHM) bultumin nimin khan Health directorate conference hall-ah ni thum awh tur NHM district programme manager, ASHA co-ordinator leh ASHA mobiliser-te tan training buatsaih a ni.

Refresher Training on NHM Functionality Reports hi NHM state programme manager Dr TC Hmingthangi'n a kaihruai a; NHM mission director Dr K Lalbiakzuala'n fuihna thu sawiin, "ASHA-te hi India ramin hriselna lama ram changkang zawkte a ûmphâk ve theih nana thawktu pawimawh an ni. Nu, nau chunga thihna leh nau piang kum nga hnuai lam thihna tih hniamna kawnga kan innghahna pawimawh an nih avangin an thâ tichaktu kan nih a pawimawh takzet a ni," a ti.

Tun dinhmunah Mizoram chhungah ASHA volunteer 987, mobiliser 66, coordinator pakua, state ASHA trainer pathum leh district ASHA trainer 18 an awm a ni.