H Rohluna'n Clean Mizoram website a hawng

School Education minister H Rohluna chuan nimin khan Information & Communication Technology (ICT) conference hall-ah ICT leh School Education department ṭangkawpin an buatsaih, Clean Mizoram website www.cleanmizoram.com a hawng.

H Rohluna chuan, Clean Mizoram Movement chu sorkar hna­thawkte leh School Educa­tion department siam programme bil a ni lo a, Mizoram mipuite ta leh hmachhawp lian tak a nih avangin a hlawhtlin ngei a ngaih thu a sawi.

H Rohluna chuan, "Clean Mizoram Movement hlawhtlinna atan Zoram mipui zawng zawng thukhat vuain kan ṭanho vek a ngai dawn a ni," a ti a; Zoram mipuite thinlung­ah faina, thianghlimna leh invawnfai hlâwkna a intuh phawt chuan fainain a ken tel hlawkna dang tam tak Mizo mipuite'n an dawn tur thu a sawi.

Parliamentary secretary (School Education) Joseph Lalhimpui­a chuan, faina chungchanga Mizoram sorkar hmalakna chu kum hmasa lama inṭan tawh a ni tih a sawi a, "Faina ngai pawimawh tak prime minister kan nei chhunzawm hi Mizoram tan phûrna nasa tak leh faina kawnga kan hmalaknate a hlawhtlin theih nana vanneihna a ni," a ti.

Joseph Lalhimpuia chuan kan bawlhhlawh khawl khawm leh hmun ṭawp laite thianfai hmasain fai leh thianghlim hlawkzia mipui thinlung ah kaih harh hmasak kan tum ang," a ti a; Mizoram a lo fai hun chuan ram hmelhmang mawi tak leh a aia boruak nuam zawk a awm lo tih hnamdang leh ramdang hriain, an rawn pan tur thu a sawi.

Website hawn inkhawm hi SSA state project director Lalhma­chhuana'n kaihruaiin, ICT secretary C Lalhma­chhuana, Education director H Lalengmawia leh SCERT director Malsawm­thangi te pawh an tel a ni.

Clean Mizoram website www.cleanmizoram.come-ah hian hashtag (‘#’) hmangin social network pathum - Facebook, Twitter leh Instagram-a account neite'n faina chungchanga hmalaknate an phochhuak thei dawn a ni.

Twitter, Facebook leh Instagram hmangtute chuan an status update-na text/media box chhungah faina kaihhnawih thila hmalakna thu emaw, thlalakte dah lut (upload) hmasain #cleanmizoram an type belh ang a, chu chu www.cleanmizoram.com ah a lut ve nghal dawn a ni.