MNYF-in lirthei hluia HSRP vuah tihtawp phût

MNF ṭhalaite chuan thuchhuah siamin, lirtheia high security registration plate (HSRP) vuah chu thil ṭul lo, mipui sum sén thlawnnaa an ngaih thu an tarlang a, Mizoram sorkar chu lirthei hluia HSRP vuah titawp turin an phût.

MNYF chuan, Mizoram sor­karin lirthei hluiah pawh HSRP hmang vek turin March 12, 2012-ah hriattirna chhuahin mipuite a barh lui niin an sawi a, December 9, 2013-ah motor hlui leh thar zawng zawngah vuah vek turin thupek a chhuah leh niin an sawi.

Sorkar thupek vanga lirthei neitu tam takin HSRP an vuahtir tawh hnuah, January 16, 2015 khan Transport minister John Rotluang­liana chuan Congress Bhavan-a inkhawmah, HSRP chu motor hluia vuah vek tura tih a nih loh thu leh a la vuah loten an vuah ngei ngei phût luih a nih loh thu a sawi tih MNYF-te chuan an tarlang. Transport minister thusawi chu nge dik a, Transport department official-te thu chhuak zawk tih sawifiah turin John Rotluangliana chu an phût a ni.

MNF ṭhalaite chuan, Transport minister thusawi chu Congress sorkar mumal lohzia tilangtua an ngaih thu an sawi a, "HSRP vuah hi mipui rawkna ang hialah kan ngai a. Transport minister sawi ang hian, motor hluiah hman a ṭul si loh chuan, nasa taka mipui sum rawk zawnga HSRP kalpui mek hi a rang thei ang bera titawp turin sor­kar kan phût a ni," an ti.