Champhaia lirthei chuan man sawiho

Champhai bawrhsap Maria CT Zuali hoin nimin khan IPR Confe­rence Hall-ah Champhaia taxi leh auto-rickshaw chuan man (fare) bituk dan turah inràwn khawmna neih a ni.

Maria CT Zuali chuan, taxi leh auto-rickshaw khalhtute chu khualzin leh mikhualte'n sorkar thuneitute aia an hmuh tam leh an hnêk tam zawk an nih avangin, Champhai hmel lanna tak tak an ni tih inhria a, chuan man chungchangah mikhualte bum tum mai lo tur leh rinawmna vawng nung reng turin a chah a, "Lirtheih khalh hi eizawnna a nih rualin, mipui rawngbawlna a ni," tiin, anmahni dawrtute hawihháwm taka chhâwn zel turin a chah.

Champhai DTO R Lalnunkimi chuan, Mizoramah taxi leh auto-rickshaw chuan man inang tlánga hman a nih theihna turin State Transport Authority-ah rawtna thlen tura tih an nih thu leh, chumi vanga inràwn khawm huaihawt an nih thu a sawi.

Meeting chuan, taxi fare atan tlan chhuah ṭanna aṭanga km. khat­ah Rs. 50, a hnu lamah km. khat zelah Rs. 40 zela belh an rawt a, auto-rickshaw chuan man atan tlàn chhuah ṭanna aṭanga km. khatah ah Rs. 30, a hnu lamah km. khat zelah Rs. 20 zel belh an rawt a, zan lamah chuan chhuna rate aia 50%-a sang ni se, an ti. An rawtna hi STA-ah la thlen leh tur a ni.

Thil danga rate chu DTO kaihhruainain, police, consumer pawl hruaitute leh taxi leh auto-rickshaw khalhtute'n sawiho se, an ti a; Champhai khawpuia lirthei tâwt lutuk tur a ziawm theih nan taxi, auto-rickshaw leh maxi-cab stand-te chu September 7, 2020-ah enho an rél bawk.