Aikal late-ah ngaihhnathiam bik an awm dawn lo - DPAR
Council of Minister thutlukna anga Mizoram sorkarin aikal lâk tihtawp a tumnaah ngaihhnathiam bik an awm dawn loh thu Department of Personnel & Administrative Reforms (DPAR) hotute chuan an sawi. Aikal lâk tihtawp tumnaah hian DPAR chuan department-te aṭangin an hmalakna an la dawng lo.
Aikal lak chungchangah hian DPAR secretary K Lalthawmmawia chuan June 19, 2024 khan office memorandum a tichhuak a; sorkar hnathawk, aikal late chu ni 30 ral hmaa an hna chhunzawm tura hriattir niin, hna zawm lote chu dan loa châwl (unauthorised absence)-ah ngaih an ni dawn a ni.
Aikal late chungchangah a ṭul anga hma laa bawhzui turin DPAR Secretary chuan department/office hotute a hriattir a; an bawhzui dan (compliance report) chu hriattirna chhuah aṭanga ni 45 chhungin DPAR (ARW)-ah thehlut turin a ti bawk.
Vanglaini palai zawhna chhangin DPAR Secretary chuan, aikal late department/office hotute'n an bawhzui dan report an la dawn loh thu a sawi a, "Hun tiam a la tâwp lo deuh a, an la rawn thehlut lo a ni mai thei, ka hnenah chuan a la rawn thleng lo," a ti.
DPAR aṭanga thu dawn danin, aikal lak chungchangah Mizoram sorkar chuan ngaihhnathiam bik a nei dawn lo a, eng vang pawha aikal lak remtih a ni lo. Sorkar hnathawk zinga hna thawk chhunzawm thei lo turte chu an chawlh (leave) neih zawng zawng lak phal sak an ni a, kutruaka an awm loh nan an pension dan tur ngaihtuahsak a ni dawn.
Council of Minister ṭhukhawm chuan, aikal la zingah ngaihhnathiam bik neih a nih chuan nghawng a neih zel dawn avangin ngaihhnathiam bik neih loh law law ṭha a ti a ni.
Aikal la mek, hna thawk zui thei lo leh duh lote tan CCS (Pension) Rules, 1972 angin voluntary retirement, invalid pension leh compulsory retirement-te dil leh pek theih a ni dawn a; dana awm sa anga châwl thei lote tan Special Voluntary Retirement Scheme siam tum a ni bawk.