Thlai lei tur pali kan thlan tawhte kan lei ngei dawn - CM Lalduhoma

Chief minister Lalduhoma chuan, sorkar leibá chinfel ngai a tam avangin ZPM policy-te kalpui nghal vut vut theih a nih loh thu a sawi rualin, thlai lei tur pali an thlan tawhte chu an lei ngei dawn thu a sawi.

Mizoram State Policy Coordination Committee nimin khan chairman Lalduhoma, chief minister kaihhruaiin CMO conference hall-ah an ṭhukhawm a, ZPM policy kalpui zel dan tur leh a kaihhnawih thilte sawiho a ni.

CM Lalduhona chuan leibá chinfel ngai a tam thu sawiin, "Kan policy-te kalpui nghal vut vut theih a ni lo a, kan leibáte hi kan rùl zel a, hma pawh kan sawn hle. Kumin hi inpuahchah kumah kan puan avangin kumin bikah hian hand holding policy hi lian takin kan kalpui thei dawn lo. Sum dinhmun ṭhat dan azirin hmalakna kan nei lian chho zel dawn a, thlai thar lei tur pali kan thlan tawhte erawh chu kan lei ngei ngei dawn," a ti.

Ṭhutkhawmah hian State Policy Coordination Committee member secretary Lalmalsawma Pachuau-in policy inkaihhruaina duan tlangpui leh sorkar kum kal mek budget-a Hand Holding Policy atana sum dah hman chhuah dan tura duante a sawifiah.

Loan hmanga Hand Holding Policy kalpui turah Credit Guarantee Fund Scheme for MSME hmanga 100% loan guarantee - progress partners-te pek theih dan leh buaipui dan te, PMEGP, KCC leh loan danga interest subvention pek theih tur zat te, progress partner thlante tana training dan tur te, monitoring kalpui dan tur te, Hand Holding Policy tlangzarh hmaa tih tur ṭul te, zau policy kalpui dan tur ruahmanna leh Hand Holding Policy-in a kaihhnawih department-te inbuatsaihna tur thilte sawiho a ni.