ZPM-in Lokayukta case pathum CBI chhuitir tura ngenna an thehlut

ZPM Legal Department chuan Lokayukta-a complaint thehluh tawh ṭhenkhat chu a kal muang lutuka an ngaih avangin Central Bureau of Investigation (CBI) chhuitir tura ngenna nimin khan Mizoram Lokayukta chairman Lalmalsawma hnenah an thehlut.

ZPM Legal Department-in CBI chhuitir tura ngenna an thehluhnate chu - Chaltlang-Durtlang ropeway leh Sakawrhmuituai tlang skywalk chung­chang te, NABARD sum hmanga Mizorama sikul eng emaw zat thawm ṭhat chungchang leh, Lengpui Airport chei ṭhat chungchangte a ni.

Thil chi thumte hi CBI chhuitir turin Mizoram sorkarin phalna (consent) an pek a ngai a nih pawhin ZPM kaihhruai Mizoram sorkarin consent a pek nghal ngei a rinawm tih tarlangin ZPM Media, IT & Publicity Department chuan, "Mizo­rama eirukna a reh theihna tur leh kan ramin hma a sawnna tura kawng pawimawh tak a nih avangin heng corruption case serious tak tak pathumte hi CBI kuta hlan turin Mizoram Lokayukta-ah ZPM Legal Department chuan ngenna a thehlut a ni," an ti.

ZPM tarlan danin, Mizoram Lokayukta Act, 2014 Section 19(5)-ah chuan corruption case-te chu chhui tura Lokayukta-in order a chhuah aṭanga thla 6 chhunga zawh tura tih a ni a, an zo hman lo a nih chuan thla 3 aia rei lo pawhsei theih a nih thu tarlan a ni.

ZPM party tarlan danin, ropeway leh skywalk chungchang, Mizoram Lokayukta case no. 37&39 of 2021 (Irregularities in the construction of Ropeway and Skywalk) chu ACB chhui turin May 30, 2023 khan pek a ni.

NABARD sum pûk hmanga Mizorama sikul eng emaw zat thawm ṭhat chungchang (Lokayukta case no. 41/2022) chu ACB-in an chhui mek. 

Lengpui Airport chei ṭhat chungchanga complaint lut (Lokayukta case no. 42/2022) chu Lokayukta ngaihtuah turin a inchiah mek thung.

NABARD sum hmanga sikul thawm ṭhatnaah sum hman dik loh a awm nia hriat chungchang chhui turin Lokayukta chuan February 13, 2024 khan ACB hnenah a pe. Lengpui Airport chei ṭhatnaah sum hman dik loh a awm nia ngaia Mizoram First-in Lokayukta-a an zualko chungchangah investigation result mumal tak tun thlengin a la awm lo.

ZPM chuan, "Mipui sum tam tak chingpenna ni ngeia lang heng case lian tak tak pathum pending mekte hi a zùzî mai ang tih a hlauhawm hle a, mipui ngaihven leh CBI ngeiin chhui se kan tih case-te a ni," an ti.