Health care scheme thar awm hmaa inenkawlna ruahman turin sorkar phût

Mizoram Pradesh Congress Committee treasurer Dr Lalmalsawma Nghaka leh hruaitu ṭhenkhatte'n nimin khan Mizoram Health Care Society chief executive officer Dr Biakthansangi hmuin, health care scheme thar a awm hmaa inenkawl theihna tur ruahman ṭul an tih thu an thlen. CEO chuan, healthcare ruahmanna thar chu October 2024 chhung ngeia kalpui an tum thu a lo hrilh.

Dr Lalmalsawma Nghaka chuan, health care scheme kal lai mek chu a tawp avangin inziah luh thar ngai, inziah luh duh, natna hrang hrangin a tlakbuakte an lainatawm thu leh an dinhmun a khirh thu a sawi a, "Cancer leh natna dang vei, inenkawl ngai, inenkawl thei si lo ṭhahnem tak an awm mek," a ti a; health care scheme thar a awm hma tal an lo inenkawl lailâwk theih nan ruahmanna siam a ṭul thu a sawi.

Health care scheme-a sum hman theih hmang zo tawh, inenkawlna atana health care scheme-a innghat mi harsa tam takin harsatna an tâwk mek nia sawiin Dr Lalmalsawma chuan, "A bik takin chemotherapy la mek te, dialysis tih ngaite leh natna hrang hrang vanga enkawl ngai mek, inenkawl chhunzawm thei lo an awm hi pawi kan ti a, an tan hian a bik taka ruahmanna sorkar hian siamsak turin kan ngen a ni," a ti.

MPCC Treasurer chuam, ZPM-in health care chungchangah ruahmanna nei angin an insawi a, manisfesto-ah pawh an telh tih sawiin, "Thuneihna an chan hnu hian an ruahmanna neih kha a hman tlak ta lo nge, an ti hlei thei ta lo kan hre lo," a ti a; health care chu mamawhtu an tam avangin hma la ngei turin sorkar an phût tih a sawi.

MSHCS CEO Dr Biakthansangi chuan, health care scheme thar ruahman mek chu October 2024 chhung ngeia kalpui an tum thu leh, health care hlui chu eng emaw chen pawhsei chungchang an ngaihtuah thu a lo hrilh a ni.