Lok Sabha MP-in rêl kawng siam mek a enfiah

Lok Sabha MP Richard Vanlal-hmangaiha chuan nimin khan Bairabi leh Sairang inkar rel kawng siam mek a tlawh a, hna thawh tawh chin leh hmabak la awmte a en.

MP Richard Vanlalhmangaiha hi Hortoki rel chawlhhmunah rel kawng siamtute nen an inkâwm a; rél kawng enkawltute chuan an hnathawh dan tlangpuite leh harsatna awmte an hrilh a ni.

Lok Sabha MP chuan, rel kawngin hma a sawnzia a taka a hmu chu a lawm thu sawiin, "Thawktute'n theihtawp an chhuahna zarah chak takin hma a sawn a ni," a ti a; an harsatnate a hnena thlen zel tura chahin, a tih theih chinah theihtawp chhuah­pui a inhuam thu a sawi.

Railways Consultant chuan, Kawnpui rel chawlhhmun thlengin rél tlân thei tawh tura buatsaih a ni tawh tih sawiin, "Harsatna lian tham a awm a nih loh chuan Sairang thlenga tlan theihna turin July 2025-ah zawh hman tum a ni," a ti.

Lok Sabha MP-in rêl kawng siam mek a ennaah hian Railways Consultant chuan, Sairang thlenga rel a tlan theih huna thawktu tur lakah Railway Recruitment Board (RRB) kaltlanga lak vek tur a ni dawn thu a sawi a, "Tualchhung mi lak theih tur chin awm ve mah se, hna sang a nih dawn loh avangin Mizo ṭhalaite'n exam an hmachhawn a pawimawh," tiin a sawi.

Railways deputy chief engineer (contruction) Harjemal Meena chuan rêl kawngin hmasawnna a thlen dan turte leh mipuite'n an chhawr ṭangkai dan turte MP a hrilhfiah a; "Khualzin phur tana a ṭangkai dawn a, bungraw hlawm lian chi phurhna atan te, thlai thar thawn chhuahna atante leh thlai thar chhe hma chite awlsam taka sawngbawlna hmun a thlenna atan a ṭangkai dawn a ni," a ti.

MP hi Kolasib bawrhsap Robert C Lalhmangaiha, Kolasib SP David H Lalthangliana leh Kawnpui SDO (Civil) Mohammad Aaquib ten an ṭawiawm a ni.

Kolasib DC chuan, rel kawng siam chhungin district administration leh thuneihnain a huam china an tih tur ṭul apiang an lo ṭawiawm zel dawn thu a sawi a; SP David H Lalthangliana'n venhimna lama an hmalak dante leh thil bo ṭhin chungchanga an chhui zui dante a sawi bawk.