RDSS hnuaia electric infrastructure work kalpui mekah hna 30% vel thawk zo tawh

Revamped Distri-bution Sector Scheme (RDSS) hnuaia Mizorama electric bill pek dan thar, kawlphetha hman man pek lâwk theihna pre­paid smart meter kalpui turin contractor thlan a la ni lo a, July thla chhungin thlan tum a ni. Aizawla infrastructure work (loss reduction) hna kalpui mek chu 30% vel zawh a ni tawh.

Power & Electricity secretary H Lalengmawia chuan Vanglaini palai zawhna chhangin, RDSS hnuaia sorkar hmasa lam aṭanga Mizorama pre­paid smart meter kalpui tura ruahmanna awm tawh chu a taka kalpui a la nih loh thu a sawi a, "Pre­paid smart meter hi sorkar laipuiin pakhat vuah (install) man a siam chu Rs 6,000 a ni a, mahse, tender kan chhuah chhángtute chuan Rs 10,000 chuanga an chhàn ṭhin avangin tender ṭum thum kan chhuah tawh a, tina ṭum thumnaah hian chhangtu pathum an awm," a ti.

RDSS chu kum 2025-26 thleng kalpui tur a nih avang leh a tawp hun a hnaih tawh avangin tuna tender chhangtu pathumte aṭangin contractor thlan a nih a beisei thu sawiin PE Secretary chuan, "Pre­paid smart meter install-na man tura sorkar laipui bituk Rs 6,000 aiin an chhang sang tho a, mahse, scheme hi kum hnih vel bak a kal tawh dawn loh avangin hma kan lak vat a ngai tawh," a ti. July 19, 2024 khian State Work Advisory Board-in tender chhangtute an ngaihtuah dawn thu leh chutah chuan contractor an thlan a rin thu a sawi.

H Lalengmawia chuan, RDSS hnuaia Aizawl khawpuia infrastructure work (loss reduction) - electric hrui hnawk thlâk, transformer thar bun belh, ban phun belh, etc. chu 30% vel zawh tawh a nih thu a sawi a, "Tunah hian central aṭangin pawisa sanction a rawn kal thar leh a, contractor-te'n an thawk tluang rih," a ti.

Power & Electricity Secrerary chuan zawhna chhangin, "Mizoram sorkar hian kawlphetha a ngai pawimawh hle a, tunah hian JICA hnuaiah external aided project kaltlangin Tuirini-ah megawatt 24 siam thei tur project ngaihtuah mek a ni," a ti a; SJVN, Himachal nen Darzo luiah megawatt 2,400 siam chhuak thei tur pump storage project atan inremna (agreement) tur buaipui mek a nih thu a sawi.

PE Secretary chuan, solar rooftop kalpui tura zirchianna neihah sorkar office 100 chuang chhinchhiah a nih tawh thu te, Thenzawla solar enegry 10 an bun mek chu rei lo têah panga hawn a nih dawn thu te, solar policy leh hydro policy-te ennawn tum a nih thute a sawi bawk.

H Lalengmawia chuan, Joint Electricity Regulatory Commission (JERC) for Manipur and Mizoram inremna chu July 23, 2024 thleng a nih thu a sawi a, "Manipur lamin nikum khan sorkar laipuiah indan an duh thu an thlen a, sorkar laipuiin Mizoram sorkar ngaihdan a la tawh bawk a, hei vang hian July 23 hnu lamah chuan Mizoram leh Manipur chuan a hranin JERC kan nei tawh ang," a ti.