KHAWTHLIR

Lei tawlh enfiah

Aizawl mayor Lalrinenga Sailo chuan nimin khan a bial chhunga Zuangtui leh Muanna Veng inkara lei tawlh a tlawh a, khawtlang hruaitute nen lei tawlh zel tur venna atana hmalak dan turte an sawiho. Mayor hian khawtlang hruaitute hnenah a ṭula hman atan Rs 5,000 leh tarpauline eng emaw zat a pe a ni.

Heroin man

Assam Rifles leh Mizoram Police-a CID (Crime) hnuaia Special Narcotics mite chuan July 15, Thawhṭanni khan Sesawng huam chhungah Taithu, Tipaimukh, Manipur lam mi nia insawi Zama inti hnen aṭangin heroin (no. 4) gram 146 an man a, dan anga bawhzui turin CID (Crime)-in an hrêng zui. Ruihhlo an man hi Rs 1,02,20,000 hu a ni.

GST zirho

Taxation department chuan nimin khan Saitualah sumdawngte leh contractor-te tan Goods and Services Tax zirhona an buatsaih a, State Tax commissioner R Zosiamliana'n a telpui. Saitual leh Keifang aṭangin sumdawngte leh contractor-te an tel a, GST nodal officer pahnih - C Vanlalchhuana leh Hrangthanmawia ten GST leh chhiah kalphung an sawifiah a, zawhna leh chhanna hun hman a ni.

Dan thar zirho

Serchhip District Hub for Empowerment of Women-in 100-Day Special Awareness Campaign under Sankalp a buatsaihah nimin khan Women & Child Developmet hnuaia thawkte leh Serchhip police-te tan SP conference hall-ah criminal law thar pathum zirhona buatsaih a ni. Master trainer Inspector Lalnunmawia'n dan thar pathum - BNS, BNSS leh BNA chungchang a zirtir a ni.

Hotute ṭhukhawm

Lunglei district bawrhsap R Lalṭhazuala kaihhruaiin nimin khan DC conference hall-ah Lunglei district-a sorkar office hrang hrang 33 aiawhte'n an hnathawh dan, harsatna leh dinhmun an sawiho. Bawrhsap chuan, Lunglei district hmasawnna tur leh mipui tan ṭhahnem ngai taka thawhpuiah department hrang hrangte a sáwm a ni.