Mi ṭhenkhatin ZNP an tinung Chî-âina tur a awm lo - ZPM

Zoram Peoples' Movement (ZPM) party kal dana lungawi lo mi ṭhenkhatin ZNP party an tinung thar leh a, hemi chungchangah hian ZPM chuan an party mipuite chu chî-âi lo turin an ngen.

ZNP tinung thar lehtute hian nimin khan Aizawl Press Club-a thuthar lakhawmtute an kâwm a, ZNP party din thar leh a nih thu an puang. An hruaitute sawi dan­in, ZPM hruaitu lailâwkte hun a tàwp tawh avangin July 15, 2020 khan ZPM Gen. Hqrs. Political Affairs Committee-in hruaitu thar ruat chungchangah Val Upa Council (VUC) kuta thutàwp siam­tir aiin, party danpui anga Executive Commitee kuta thutàwp siam tura thlen duh an tam zawk a, hruaitu ding laite'n VUC kuta 2023 thleng ruattir an duh thung.

Thu an inchuh hnuah, 'Kumin September ral hmaa Executive meeting koha rèl ni se, hri léng vanga ṭhutkhawm theih a nih loh chuan PAC-in thlir hmasa leh phawt rawh se' tiin thu dah a ni. ZPM hruaitute'n Lalduhoma chu nasa takin thlêm a, VUC kuta hruaitu lailâwk ruattir duhna chu hnial ṭhin ni mah se, thiam leh mawi taka an thlêmna hnial ngam loin, an barh luih chu a pawmpui ta niin an sawi.

Hetih lai hian ZPM chuan thuchhuah siamin, ZNP chu September 3, 2020-ah ṭhiah a ni tawh a, ṭhiah a nih thu chu Election Commission of India (ECI)-ah thlen tawh a nih thu an tarlang.

ZPM tarlan danin, July 15, 2020 khan ZPM Extended PAC meeting-in ZPM elected office bearer term, August 5, 2020-a tàwp tur chungchang leh páwl kal zel dan tur rêl. Meeting-ah hian ZPM hruaitu thar tur chungchang sawi a ni a, 'Pawla thuneitu ber Executive Meeting chu September thla ral hmaa koh tum hrâm ni se, koh theih a nih loh chuan PAC-in ngaihtuah nawn leh se,' tia dah a ni.

August 12 khan Extended PAC meeting ko lehin, ngaihtuah nawn a ni a, lungrual takin hruaitu thar (elected OB) tur chu Val Upa Council (VUC) kuta dah a ni ta a ni.

VUC chuan tunah hian hruai­tu thar ruat leh turin ngun thlûk leh fimkhur takin an ngaihtuah mek a, ZPM mipui chuan VUC chungah rinna nghatin, nghakhel takin an thlir mek a ni. ZNP din thar lehtute'n VUC chu an ring zo lo nia a lan thu tarlangin, "VUC ber ring zo lo chu ZPM-ah an leng ta lo a, an chhuak a, party ṭhiah tawh hnu ZNP an din thar leh ta a ni," an ti.