Sikul 1,270-in zirlaibu an la dawng kim lo

Samagra Shiksha, Mizoram chuan sorkar primary school leh middle school-a a thlawna sem tur zirlaibu a order zinga 63.95% chiah a la dawng a; sikul 1,270-in zirlaibu an la dawng kim lo.

RTI Act tlawhchhana zawhna July 5, 2024-a Samagra Shiksha Mizoram SPIO-in a chhan danin, zirlaibu la dawng kim lo sikul 1,270 an awm a, primary school 581 leh upper primary/middle school 689 an ni. Zirlaibu print-tu chu Mizoram sorkara Printing and Stationary department hnuaia Government Press a ni.

Samagra Shiksha Mizoram hotute chuan Vanglaini palai zawhna chhangin, kum 2024-25 academic session atan zirlaibu 4,05,000 vel SCERT-ah an order tih an sawi a, "Heng zinga 63.95% chiah hi zirlaibu print-tute hnen aṭangin kan la dawng. Zirlaibu la dawn kim loh zingah hian science leh mathematics subject a tam ber," an ti a, zirlaibu sem tur an dawn kim theih hun tur an hriat loh thu an sawi.

Zirlaibu print tur zat chu kum hmasa lama zirlai naupang awmzat aṭanga an chhût hnuah SCERT hnenah an thehluh ṭhin thu Samagra Shiksha hotute chuan an sawi a, "Keini hi chu naupang awm zat tur aṭanga chhûta zirlaibu mamawh zat SCERT-a thlentu leh a print-tute hnen aṭanga zirlaite hnena sem chhuaktu kan ni a, zirlaibu chhut chungchangah chuan thuneihna kan nei lo. Zirlaibu hi a print-tute hnen aṭanga kan dawn veleh kan hotute'n zan hnih bak a riak thiang lo an tih avangin a rei berah kan hnenah zan khat bak a riak ngai lo. Kan sem chhuak nghal char char," an ti.

Sikul ṭhenkhatin science leh mathematic textbook an dawn chungchangah Samagra hotute chuan, kum hmasa lama an print tir tawh, an sem bângte kuminah sem tura an lei leh avangin sikul ṭhenkhat chuan zirlaibu an dawn kim tawh thu an sawi. Kum 2023 khan Aizawl district bikah ráltlân zirlai 4,600 hnenah zirlaibu an sem tel thu leh district dangah pawh zirlaibu an sem nual thu an sawi bawk.