Kuhva rah tawlh rutu ZPM mite laka mit siai lo turin MNF-in sorkar an phût

MNF party chuan thuchhuah siamin, Myanmar aṭanga dan loa kuhva tawlhrûkah Champhai lama ZPM hruaitute an inrawlh niin an tarlang a; kuhva rah tawlh rutu ZPM party mite laka sorkarin mit a la siai khum zel chu bànsan turin sorkar an phût.

Tun hnaia Vairengte leh a chhehvela kuhva rah bothlau zawn chhuah tuma hmalakna kal zelah July 7, 2024 khan Mizoram Police-in Phaisenah kuhva 407 truck phur khat leh an lak chhuahna kudam aṭangin ip 145 vel man chhuah a nih thu puanzar a ni tih MNF chuan an tarlang a, "He kuhva neitu nia rin hi Pu Lalchhuanliana, Ruantlang a nih thu tarlan a ni," an ti.

MNF tarlan danin, Lalchhuanliana, Ruantlang chu ZPM Champhai South Block-a information joint secretary a nia hriat a ni a, a unaunu chu Ruantlang ZPM VC member a nih bakah, a unaunu pasal chu ZPM Champhai South Block president a nia hriat a ni. Phaisena kuhva chhehrelhsaktu chu Lalṭanpuia niin, Phaisena ZPM secretary a ni a, an in hnuai kudam aṭangin kuhva rah man chhuah a ni.

MNF party chuan, "Heta ṭanga lang chiang tak chu an sorkar aṭanga thla khat chhunga dan loa bungraw tawlh tihtawp tum ZPM sorkar hian tihtawp chu sawi loh, a tawlh ṭhintute zinga ZPM mi leh sa chu an mit an la siai khum zel tih a tilang chiang hle. An thil chìn tenawm tak hi bànsan thuai se kan duh tak zet a ni," an ti.

ZPM sorkar chu Mizorama kuhva chíngtute harsatna tawh mek ngaihthahah puhin MNF chuan, "An mi leh sate hlâwkna tura an thil sual tih pawh an la ngaihhnathiam zel a ni tih a tilang chiang hleah kan ngai," an ti a; kuhva ip 5,000 chuang bo chu chhui chhuak a, a rutu hrem ngei turin sorkar an phût tih an sawi bawk.