MSPMC-in hna thawh mek an endik

Mizoram State Project Monitoring Committee (MSPMC) chuan July 15, Thawhṭanni khan Civil Hospital, Aizawla Cardiology department tihchangtlun hna te, MINECO-a AYUSH Development Centre sak leh Khatlaa Veterinary Information & Resource Centre sak mekte an endik.

MSPMC hian Aizawl Civil Hospital-a Cardiology department tihchangtlun hna thawh mek an endiknaah thawktute nen Cardiology department hman lai mek chu sawn maina tur hmun âwl remchang a awm loh avangin hna thawhnaah harsatna an tawh te, sorkar aṭanga sum pek chhuah har vanga harsatna an tawhte sutkian dan tur an sawiho a ni.

AYUSH Development Centre sak mek chu chhâwng li tur a ni a, ruahman anga sak a nih leh nih loh MSPMC-in an endik. North Eastern Council (NEC) aṭanga sum hmuh nuai 264.16 hmanga sak niin, hna thawh tur aṭangin 50% zawh a ni tawh. Ruahman anga a puitlin theih nan MSPMC chuan hmalak zui dan tur department hotute leh contractor-te an sawipui.

Veterinary Information & Resource Centre chu NEC aṭanga sum hmuh nuai 339.25 hmanga sak niin, 35% zawh a ni tawh a, September 2025-a sak zawh tur a ni. MSPMC team hian department hotute leh contractor chu hna kal mekte ṭha tak leh chak taka a kal theihna tura hmalak chhunzawm dan tur an sawipui a ni.

Hna thawh mek endiknaah hian MSPMC hi vice chairman R Lal Rinawma hoin an kal a; member secretary Lalthanzuala Ralte bakah member - architech George Lalzuia, Lalbiakmawia Khiangte leh Lalremsangi Fanai leh, MSPMC task force Vanchhungi te an tel a ni.