JNV tan buhfai tlâwm zawka lei rêl

Lawngtlai bawrhsap Cheemala Siva Gopal Reddy hoin nimin khan a pisaah Sihtlangpuia Jawahar Navodaya Vidyalaya (JNV) chungchang ngaihtuahtu Vidyalaya Management Committee (VMC) an ṭhukhawm a; JNV-a zirlaite ei tur buhfai man tláwm zawka lei tura hmalak an rêl.

Ṭhutkhawmah hian Sihtlangpui JNV-a tuia harsatna awm mek chu PHE hotu hnenah thlen ni se, tui thianghlim dahna tur tuizem lian siam tura hmalak ni se, an ti a; power supply a ṭhat loh vanga harsatnate Power & Electricity department-ah thlen an rel. Zirlaite ei tur buhfai man tláwm zawka lei a nih theih nan DCSO-in FCSCA Directorate-ah a ṭul angin lo thlen se, an ti.

Naupangte hriselna dinhmun endika turin doctor-in a tlawh theih nan Lawngtlai Chief Medical Officer chu a ṭul leh remchan dan anga hma la turin an ruat a; JNV building leh kawngte ṭha taka enkawl chhunzawm zel tur leh hmalak ngaihna laia chak zawka hmalak a nih theih nan PWD-ah thlen an rêl bawk.

Bawrhsap chuan, Sihtlangpui JNV Principal leh a thawhpuite chu zirlai enkawlnaah nasa zawka ṭan la tur leh ṭhahnema ngai taka thawk turin a chah a, "Zirlaite'n phone an khawih nasa hle a, hun ṭha tam tak an khawhral ṭhin. Social media khawih dan tâwk an thiam a pawimawh," a ti.

Online platform - Khan Academy-ah JNV zirlaite an inziak lut vek chu lawmawm a tih thu sawiin DC chuan, "Khan Academy hian mathematics leh science-ah zirlaite ṭanpui thei tur online courses ṭha tak tak an dah ṭhin," a ti a; Lawngtlai district-a sikul zawng zawng chu Khan Academy-ah inziak lut vek turin a chah.

JNV principal Anil D Dhawane sawi danin, Sihtlangpuiah kum 2007 khan JNV din a ni a, pawl 6-12 thleng zirna awmin, zirlai 336 leh thawktu 41 an awm mek. Admission ti duhte tan kum tin Lawngtlai, Chawngte leh Siahaahte exam buatsaih ṭhin a ni.