Serchhip Bawrhsap leh MJA inkâwm

Serchhip district bawrhsap Paul L Khuma chuan nimin khan DC meeting hall-ah MLA, Serchhip district member-te a kâwm a, Serchhip district hmasawnna tura thawhpuiah a sáwm.

Paul L Khuma chuan, khua leh tuite'n sorkara an harsatna leh vuivaina an thlen theihna tur leh an chanvote an zawhfiah theihna tur Mipui Aw (mipuiaw.mizoram.gov.in) hman ṭangkai thiam a ṭul thu a sawi a, "Mipuiin sorkar hnathawh kan vil theihna tur - Mizoram Right to Public Services Act hi mipuiin ṭangkai lehzuala kan hman thiam a ngai," a ti.

Thuthar thehdarhtute chu mipui sûkthlêk her danglam thei khawpa thil ti thei an nih thu sawiin DC chuan, district hmasawnna atan theihtawp chhuah zel tur leh thawhhona ṭha tak an neih a beisei thu a sawi.

Serchhip MJA member-te chuan, Serchhip district mipui harsatna tawh hrang hrang - Cyclone Remal vanga chhiatna te, NH-54 kawng laihin a nghawng te, vawk vulhtute'n ASF vanga buaina an tawh mek te, ruihhlo do leh khawtlang tana thil pawimawh an vei zawngte DC hnenah hian an sawi a ni.

Bawrhsap chuan, NH-54 chung­changa complaint lutte a hmunah an endik thu leh an hmuh dan report-te sawiho a nih tawh thu thuthar thehdarhtute a hrilh a; NHIDCL hnuaia contractor-te ko khawmin, kawng laih vanga harsatna thleng hrang hrangte chinfel dan an ngaihtuahho dawn thu a sawi bawk.