Ration card thehlut an la awm lo Buhfai man ennawn tumna a awm lo - FCS&CA dept.

Food Civil Supply & Consumers Affairs (FCS&CA) department ngenna zawma ration card thehlut (withdraw) an la awm lo. Hetihlai hian, Mizoram sorkarin buhfai man ennawn tumna a nei lo nia thudawn a ni.

FCS&CA department chuan sorkar hnathawk lian leh sumdawng hausate chu an ration card sorkara thehlut turin an ngen a ni. Ration card thehlut an awm chuan FCS&CA dept. chuan ration card thehluttute chu ration card dang, ration lakna atan ni lo, document atan bika hman tur siamsak an tum a ni.
palai zawhna chhangin FCS&CA hotute chuan, "Sorkar hnathawk lian leh sumdawng hausa zingah ration card thehlut an la awm lo. Ration card thehlut tur hian awarness kan la ti thei loa, V/C inthlan a hnaih avangin tun hnaiah chuan awarness hi tih chiah kan ngai hrih lo," an ti a, ration card thehluh hi sorkar hnathawk lian zingah tih ngei ngei tur (compulsory) a tih tumna a awm loh thu an sawi.
Mizorama ration card awm zat leh mihring awm zat inmil loh chungchangah FCS&CA department hotute chuan, "Tun dinhmunah chuan ration card leh mihring inmil lo lutuk a reh theihna atana hmalaknain awmzia a la nei vak hrih lo. Ration card computerisation kan kalpui mek a, tunah hian 9000 vel thunluh loh kan la nei. Computerisation hi kan tih zawh hunah chuan ration card hi a tlem phah ngei ang," an ti.
MNF ten bufai man tih­hniam an phut chungchangah FCS&CA dept. hotute chuan tun dinhmunah chuan buhfai man tihdanglam tumna a awm an hriat hrih loh thu Vanglaini an hrilh.
FCS&CA hotute sawi danin, tun dinhmunah Bairabi rel kawng siam avanga mega block awm mek avangin buhfaiah Mizoramin harsatna a tawh phah loh bakah, harsatna a awm lohna atan Mizoram sorkar theihtawp a chhuah zel a ni.