Aizawla police station-ah reserved team dah a ni
Ni hnih awh tur Aizawl District Crime Review Meeting chu nimin khan Aizawl SP conference hall-ah ṭan a ni a, meeting hawngtu addl. DGP Lalthianghlima Pachuau chuan Aizawl khawpuia police station-ah reserved team dah an ni tih a sawi.
Tun hnaiah beisei lawk loh Law & Order situration lian tham a awm zeuh zeuh avangin Aizawl khawpui chhung bika police station paliah reserved team dah an ni tih sawiin Addl. DGP chuan, "Heng reserved team-te hian zana law & order lian tham thleng reng reng chu an chhui zui thuai thuai dawn a ni," a ti a, police dangte pawh reserved team pui tura thawk chhuak zung zung thei turin ruahmanna siam a ni tih a sawi.
Lalthianghlima Pachuau chuan police-te chu sual venna kawnga taima leh rinawm taka thawk tur te, hnuchhuina kawnga huaisen taka leh dik tak thawk turte leh politics-a inhnamhnawiha mahni hamṭhatna um lo turtea fuihin, "Police hna hi Pathianin kan eizawnna atana min pek a ni tih pawmin, taima tak leh inpekna thar nen i thawk zel ang u," a ti.
Meeting-a tarlan a nih danin, Aizawl district-ah hian kum 2013 aiin kum 2014 ah case register 215 in a tam zawk a, case lian zual bik (Special Report Case) pawh kum 2013 aiin 2014 ah a pung zawk a ni. Kum 2013 khan thubuai 1059 ziahluh a ni a, kum 2014 ah chuan thubuai 1301 ziahluh a ni thung.
Crime Review Meeting hi vawiinah chhunzawm a ni dawn a, Department of Non-Banking Supervision aṭanga lokal Rohan Pareira chuan 'Unauthorized collection of money by dubious entities' tih thupui hmangin thu a sawi ang.