Khawthlir

Martyr's Day
Vawiin hian ram chhung hmun dang rualin Martyr's Day hman a ni dawn. Zing dar 11 ah siren tih rik a ni dawn a, siren rik rual hian lirthei a tlan lai leh kea kal laite chu ding vek tura hriattir an nih bakah, hnathawh lai neite pawh an hnathawh chawlhsan vek tura tih an ni.

Certificate hlan
Nimin khan Horticulture conference hall-ah Mizoram Youth Commission (MYC) leh Mizoram Building & Others Construction Works Welfare Board bultuma Emporium Training Consultancy Pvt., Ltd. Kolkata a professional course hrang hrang training zo Mizo ṭhalai 39 hnenah certificate hlan a ni.

Tuikhuah humhalh
PHE Department chuan thuchhuah siamin, Hun­thar Venga Chhawn­zinga tuikhuah leh a chhehvel chu humhalh tlat a nih thu a puang. He tuikhuah leh a hnar ram zawng zawng chu phalna hmu hmasa lovin mimal, pawl leh department hman an hman khap. Khapna thupek hi Mizoram Water Supplies (Control) Act, 2004 tlawh chhana chhuah a ni.

Primary zirtirtu
Mizoram Public Service Commission (MPSC) chuan School Education department hnuaia primary school zirtirtu atan mi 42 a la thar. Mi 42 bakah hian panel list-ah mi 15 dah an ni.

Library hawng
Mara Students Organisation (MSO) library chu nimin khan Saiha addl. DC Beila Khithie in a hawng. MSO library-ah hian lehkhabu 650 a awm mek a ni.

Weighbridge hawng
Taxation department-in Vairengtea an checkgate-a weighbridge an bun thar chu nimin khan Taxation commissioner Lalthangliana Varte in a hawng.