National Cleanliness Day hmang turin hriattir

Mizoram sorkar chuan sorkar office zawng zawngte chu vawiinah National Cleanliness Day hmang turin a hriattir. Sorkar office-te chu anmahni office ṭheuhah faina hnatlang nei tura tih an ni.

Local Administration Department (LAD) pawhin District Local Administration officer-te chu anmahni district ṭheuhah faina beihpui thlak turin a hriattir. LAD hriattirna in a tarlan danin, village council-te pawhin bawlhhlawh paihna tur hmun bik an siam tur a ni a, in tin­in inthiarna leh bual in an nei tur a ni. Kar tin Zirtawpni-ah emaw Inrinni-ah chhungkaw tinin anmahni in leh a vel bakah an in bula kawngte an tifai ṭhin ang.

Sikul leh office-te pawh Zirtawpni apiangin an sikul leh office tifaiin an hnatlang ṭhin tur a ni. Mipuite chuan an veng chhunga tuikhur, hall leh vantlang inthiarna te an tifai ang a, khaw tinin hmun remchang laiah bawlhhlawh bawm, tlo ṭha tak dahin an enkawl zui bawk tur a ni.

Faina beihpui thlak dan hi LAD field inspector leh asst. field inspector-te'n an endik ang a, an thil hmuh dan chu a hunbi dik takah DLO-in State Level Committee-ah a thawn ṭhin dawn a ni.

Hetihlai hian vawiin hian Mizoram sorkar buatsaihin hmun hrang hrangah Faina Hnatlangpui neih a ni dawn a, Aizawlah chuan sumo dropping zone, Electric Veng-­ah chief minister Lal Thanhawla hoa hun hman a ni ang.