Mirethei zawkte'n buhfai an dawn theihna atan Sorkarin hma a la mek - TT Zothansanga

Parliamentary secretary (Supply) TT Zothansanga chuan nimina Champhai District Hospital-a intercom a hlannaah thu sawiin, mirethei zawkte'n tun aia tam buhfai an dawn theih nan sorkarin hma a lak mek thu a sawi.

TT Zothansanga chuan India ram hmundang nena khaikhinin Mizoramah ration buhfai ei an tam thu sawiin, "Hmundangah chuan chawhrualin mipui 20-30% in an ei laiin Mizoramah chuan mipui 100% ten ration buhfai kan dawng a ni. Mi harsa zawkte tan thla khata kg riat chu kham khawp a nih loh avangin, a mamawhte tan semzai a nih zawk theih nan VIP quota chu tih tawp a ni," a ti.

Parliamentary Secretary chuan ration buhfai man tihsan chungchang sawilangin, "Kg khat man Rs. 9.50 aṭanga Rs. 15 a buhfai man tihsan a ni hi thildang man a to tawh vang a nih mai bakah sorkar laipuiin FCI aṭanga buhfai hralhchhuahna man a san zel vang a ni," a ti a, BPL (buhfai kg1 ah Rs. 3) leh AAY (buhfai kg1 ah Rs. 6.15) chhungkuate dawn ṭhin chu tihdanglam a la nih ve loh thu a sawi.