Current awm that theih nan P&E Minister-ah ngenna thlen

MSU hruaitute chuan nimin khan Power & Electricity department enkawltu Lal Thanzara a pisa-ah an hmu a, zirlai leh mipuite'n tun aia chang­tlung leh mumal zawka current êng kan hmuh theihna tura ruahmanna siam turin an ngen.

MSU chuan thu­chhuah siamin an ngen­na hi Lal Thanzara hian a ngaih pawimawh thu leh a rang thei ang bera P&E department hotute lo sawipui a tum thu a lo hrilh tih an tarlang.

MSU chuan February thla aṭang hian class X leh class XII zirlaite'n HSLC leh HSSLC exam an hma­chhawn dawn tih sawiin, "Hetiang a nih lai hian khawpui leh thing­tlang hmun ṭhen­khatah current êng a mumal lo hle. A bikin zan lamah hunrei tak chhung êng a thim chang a awm ṭhin a, zirlaite'n harsatna an tawh phah ṭhin a ni," an ti a, mumal zawka khawpui leh thingtlanga êng pek chhuah khai­rual a nih theih nana ṭan la turin sorkar thuneitute an ngen.