Ransate dikna chanvo sawiho

Nimin khan Aizawl District Crime Review Meeting neih karlakah People For Animals te nen ṭangtlangin "Ransa leh ramsa te dikna chanvo" chungchang seminar, Aizawl SP Conference Hall-ah buatsaih a ni.

Seminar hi Aizawl addl. SP Rex Zarzoliana'n kaihruaiin People For Animals president Lucy Vanlalruati chuan The Prevention of Cruelty to Animals Act, 1960 leh Indian Penal Code Section 428/429 in ranvulh leh ransa te a humhalh dan a sawifiah a, Mizorama ran phurh kual dan tam zawk chu hrem theih anih thu sawiin, sumo leh motor hnunga hrehawm taka ran phur hmuh tur an awm leh ṭhin chu pawi a tih thu a sawi bawk.

Dr Vanlalchhandama (M.VSc) chuan tunlai hian ranvulhte lakah nunrawnna a thleng nasa hle tih sawiin, "Aizawlah silai hmanga zawhte kah ching an awm hi a nunrawnthlak takzet a ni. Lirthei khalhtu mi tam takin ranvulh, ui leh zawhte emaw ar chilhlum an awm ṭhin a,hetiangah hian a neitute hnena ngaihdam dil ṭul ti lo, "ran mai mai" tia kalsante an awm ṭhin. Hetiang hi ran laka nunrawnna dik tak a ni," a ti. Seminar-ah hian police-te nen ṭangruala ranvulh laka hleilenna tihtlem dan turte sawiho a ni.