AIDS dotu NGO te pawisa dawn loh hrethiam lo
MNF chuan thuchhuah siamin MSACS aṭanga NGO hrang hrangte'n ṭanpuina an dawn ṭhin September, 2014 aṭanga an hmu thei lo chu hriatthiam har an tih thu an tarlang.
MNF chuan AIDS dona kawnga thawh hlâwk tak tak te’n an mangan thu an au chhuahpui nia sawiin, "AIDS veite damdawi chi hrang hrang pek chhuah tur a awm mumal tawh lo a, a vei thar tur te venna kawnga hmalakna a hlamzuih chho mek te hi rapthlak kan ti. Hetiang boruak chhe lutuk Mizoramin a tawh mek laia Health Minister a ngawi reng mai hi MNF chuan mak kan ti hle," an ti.
MNF chuan NGO te hnena Congress sorkarin sum a pek chhuah theih loh chhan ber chu central-in Mizoram State AIDS Control Society hnena sum a pek tawh, Congress sorkarin NGO te hnena sum a pek chhawn ṭhat duh loh vang nia sawiin, sawifiah turin Health Minister an phut.
Damlo thisen dawngtute'n blood processing fee atana Rs. 550 an chawi hnu pawhin blood bag indaih loh avangin a thlawna thisen pe duhte'n an pe thei lo tih sawiin MNF chuan, "Blood bag leh test kit chi hrang hrang neih loh vanga sorkar damdawi-in te’n thisen an dawng mumal thei lo te, blood donation camp buatsaihna pawh an pan thei ta lo chu Health Minister tan mualphona tawpkhawk a tling," an ti.
MNF tarlan danin, kum 2013 - 2014 khan Mizoram pumah thisen unit 22,226 pek a ni a, National AIDS Control Society (NACO) guidelines/rate ang chuan unit khat Rs. 1,500 a ni. MSACS leh state blood transfusion council kaltlangin damdawi In hrang hranga blood bank-te’n tlawmngaia thisen pete leh damlo chhungte aṭanga thisen an dawnte chu a thlawnin an test
ṭhin a, damlo hnenah a thlawn vekin an pe chhuak leh thin. NACO in 25% Rs. 375 chu state sorkarin tum ve tawh tura a tih avangin Congress sorkar chuan 36.7% Rs. 550 damlote a chawitir a ni.