Hnahthialah hnatlang lai intibuai

Hnahthial Lungleng Veng Joint Action Committee (JAC) Media Cell chuan, September 2, Thawhlehni zinga an veng chhunga YMA-in waiting shed sakna hmun tur kawngpui kam chhak lam hmun ruaka leivûng tla an paih fai tur chu Hnahthial Chanmari Veng mite'n an tibuai nia sawiin, an dem thu an tarlang.

Hnahthial Lungleng JAC tarlan danin, waiting shed sak tura hna thawh chu August 31, 2020-ah an ṭan a, Hnahthial South-I VC President hriatpuinain hmunhma chu an cheibáwl an ni. September 2-a an hnatlang leh tur chu Chanmari Veng mite'n an tibuai ta a, chuvang chuan an thawk chhunzawm thei lo. Hnahthial BDO, SDPO leh police dangte a hmunah an kal nghal a, buaina lian zawk chhuak loin an inkhap dai thei a ni.

An hnatlang tur tihbuai an ni chu mak an tih thu leh an hriatthiam loh tak zet thu sawiin Lungleng Veng JAC chuan, "Chanmari Veng ṭhalaite chêt dan hi kan veng zahlohna lian takah ngaiin, kan dem tak zet a ni," an ti.

JAC tarlan danin, Lungleng Veng leh Chanmari Veng mite chu hmun ṭhenkhatah an inchèn pawlh a, inchèn pawlhna laia veng pahnihin bazar an inṭâwm, 'Nauhruaikâwn Bazar' chu Chanmari lamin 'Chanmari Bazar' tiin bangah an ziak.

Chanmari Bazar tih chu duh loin Lungleng lam chuan sorkarah an thlen a, sorkar pawhin 'Nauhruaikawn Bazar' tia thlâk turin order vawi hnih a tichhuak tawh a, a copy pawh Hnahthial DC leh SP pek an ni. Hnahthial BDO & SDO(C) pakhat pawhin Chanmari Bazar tih inziak chu a nawh rehtir tawh a, a insawn hnuah an ziak ṭha leh bawk.

Nauhruaikawn Bazar building banga Chanmari Bazar tih inziak, tun thlenga nawh reh a la ni lo chu an dodal thu sawiin Lungleng Veng JAC chuan, "Chanmari Bazar tih inziak nuai reh hlen a nih loh chhan hi sorkarin Chanmari mipui a hlauh vang em ni tiin kan zawt a, a rang thei ang bera min nawh rehsak turin sorkar kan ngen nawn leh a ni," an ti.