A thlàwna sem tur buhfai hralhte Hrem ngei tur an ni - FCSCA Minister

Food, Civil Supplies & Consumer Affairs (FCSCA) minister K Lalrinliana chuan, Covid-19 vanga sorkar laipuiin buhfai a thlàwna sem tura a tih, man neia lo hralhte chu an hrem ngei tur thu Assembly House a hrilh.

ZPM Legislature Party leader Lalduhoma'n, a thlâwna buhfai sem tur, mipui hnena hralh an awm tih a hriat chian thu a sawi chungchangah K Lalrinliana chuan, "Department chuan dan ang takin a thlàwna sem turin kan pe chhuak a, lo tiru an awm chuan hrem ngei ngei tur a ni. Chutiang kan hria a nih chuan action kan la ngei ngei ang," a ti.

FCSCA Minister chuan ZPM member Dr Vanlalthlana zawhna chhángin, FCI kudam aṭanga buhfai lâkte chu sorkar kudama dah a nihin digital weigbridge emaw, digital weighing scale emaw, beam/manual-te emaw hman ṭhin a nih thu a sawi a, "Digital scale hi hmun pathumah leh manual scale hmun 117-ah hman a ni," tiin, digital weighing machine chu hmun pathumah hman a nih thu a sawi.