Clean Mizoram Movement tan a ni Mizoram pumah faina hnatlang neih a ni

Nimin khan Mizoram pum­ah Clean Mizoram Move­ment hman a ni a, zing dar 7:30-ah Aizawl Electric Venga maxi-cab stand-ah chief minister Lal Thanhawla'n a hawng a, faina hnatlang rûnpui neih nghal a ni. CM chuan, Mizoram mipuite chu mahni in leh lo ṭheuh aṭanga faina bul ṭan tur leh, khua/veng fai ber nih tum ṭheuh turin a chah.

CM Lal Thanhawla chuan, faina leh thianghlimna chu India Hnampa Mahatma Gandhi-a'n a ngaih pawimawh thu leh prime minister Narendra Modi pawhin a dah pawimawh a, Swachh Bharat Abhyan kalpui a nih thu a sawi a, "Mizoramah pawh Clean Mizoram kalpui tawh ṭhin a ni a, faina hi Pathian an teuhna ber a ni," a ti.

Sikul naupangte thlenga fai an ngaih pawimawh theihna turin sikulah hmeichhia leh mipa tan a hrangin inthiarna siam a nih thu sawiin, Lal Thanhawla chuan, "Faina hian hriselna thlen a, keimahni leh kan khawlai, kan chenna bul vel kan vawng fai tur a ni," a ti a; zûk leh hmuam chu a thlawna sum khawh ralna, hriselna tichhe thei leh bawlh­hlawh siamtu a nih avangin sim tum turin mipuite a chah.

School Education minister H Rohluna chuan, faina hnatlang rûnpui chu Mizoram tana hlâwkna têl theih tur bul ṭanna a nih a beisei thu a sawi a; Mizoram mipuite chu mahni theihna záwnah ṭheuh faina hnatlang lo zawm turin a sáwm a ni.

Hawnna inkhawm kai­hruaitu, Joseph Lalhimpuia, par­lia­mentary secretary chuan, Clean Mizoram Movement-ah Zoram mipui zawng zawngte an tel a, tih theih an neih vek thu a sawi a, "Zirlai naupang zawng zawngte leh YMA branch hrang hrangte'n khawlai tifaiin bul an ṭan dawn a, faina hnatlang rûnpui hi a tawpna a ni lo a, bul ṭanna tur a ni," a ti.

Clean Mizoram Movement hawn­naah hian minister, par­liamentary secretary leh MLA-te leh tlawmngai pawl hrang hrangte an tel a; hawnna inkhawm zawhah maxi-cab dropping zone leh a bul vel an phiatfai nghal.

Fai hnatlang rûnpui hi Mizo­ram district headquarters tinah leh khaw hrang hrangah hman a ni a; khua leh veng hrang hrangin khawlai thenfai hnatlang an neih bakah, National Cleanliness Day a nih angin, sorkar hnathawkte'n an pisa ṭheuh tihfai hnatlang an nei bawk a ni.