Khawthlir

Thisen pe
College hrang hranga zirlaite telna, Inter-College Youth Adventure Club chuan nimin khan Aizawl Civil Hospital-ah thisen unit 102 an pe a, a petute hi mipa 79 leh hneichhia 23 an ni.

Missionary seminar
Mizo Academy of Letters leh Chhimtuipui Academy of Letters buatsaihin nimin khan Serkawna sap missionary-te bangla-ah State Level Seminar on Western Missionary neih a ni a, MADC CEM RT Zachono-in a hmanpui.

VC draft roll
Nimin khan district khawpui hrang hrangah Draft Village Council Electoral Roll, 2015 târ chhuah a ni a, bialtu ERO leh khaw tina AERO-te hnenah en theih a ni. Draft roll-ah hian sawisel duh nei tan February 2-4 chhung hun hawn a ni a, final roll chu February 16-ah târ chhuah tum a ni.

Stadium tlawh
Minister PC Lalthanliana chuan nimin khan Serkawn, Lungleia Lena Stadium sak mek a tlawh a, hnathawh dan a enfiah. Lena Stadium hi cheng vaibelchhe 24.1 sênga sak tur a ni a, May, 2016-a zawh tura ruahman a ni.

Chapchar Kût
Art & Culture minister R Romawia hoin nimin khan a pisaah Chapchar Kut Organising Committee an ṭhukhawm a, March 6, 2015-a Chapchar Kût hman dan tur an rêl. Chapchar Kut hi Lammualah hman a ni ang a, Kut Pa atan chief minister Lal Thanhawla beisei a ni.

Ph.D hmu thar
Lalthansangi Fanai chuan Mizoram University-a English department aṭangin doctor of philosophy a hmu thar a, a thesis chu, 'Voices of women: A feminist study of Bapsi Sidhwa's Novels' tih a ni. Lalbiaksangi Chawngthu pawhin MZU English department aṭangin Ph.D a hmu thar a, a thesis chu, 'Breaking the silence: A study of female protagonists in selected novels of Shashi Deshpande and Kamala Markandaya' tih a ni.