Sorkar chêt dan thlir zui tum

MNF senior vice president Tawnluia chuan, 'Mipui thlavang hauhna kawng zawh' an neih hnua sorkar hotute leh official-te chêt dan an thlir zui zel thu a sawi a, "Kan tih tur kan hai dawn lo," a ti.

Tawnluia hian nimin khan Mizo Hnam Runah thu sawiin, "Buhfai man 58%-a an tihsan ennawn an tum loh thu an sawi a, hei hian mipui an zah lohzia a tichiang. Hei hi ka chah duh, kan ngawi mai mai dawn lo tih hi lo hre rawh se,” a ti a; Congress sorkar chu tihsan theih ang tisang vekah a puh.

Democracy ramah chhiah pek leh chhiah tihpun chu thil kalphung pangngai a nih thu a sawiin, Tawnluia chuan, "Congress sorkarin uchuak taka 50% zela mipui hnena chhiah a khawn hi engti zawng maha ngawih bopui chi a ni lo," a ti.