Sorkar hna aṭangin mi 23 chawlhtir an ni

Sorkar kum kal ta, 2013-2014 chhung khan chhan hrang hrang avangin mi 1930-in Mizoram sorkar hna an chawlhsan a; chung zinga 23 chu sorkarin hnathawk tlak tawh loa ngaih vanga compulsory pension-a a chhuahtir an ni.

Vanglaini-in docu­ment a neiha a lan danin, Mizoram sorkar hna aṭang­a chawl zingah hian group-B an tam ber a, mi 776-in sorkar hna an chawlhsan. Group-A ah mi 188, group-C ah mi 628 leh group-D ah mi 338-te'n sorkar hna an chawlhsan bawk. Sorkar hna chawlhsan zingah pension hun tawh vanga chhuak (superanuation pension) an tam ber a, mi 910 an ni.

Hna thawk tlak tawh loa ngaih vanga chhuahtir (compulsory pension) mi 23 zinga mi 20 chu group-C an ni a, group-B pathum awmin, group A leh D-ah an awm lo thung.

Sorkar hna chawlhsan zingah hian hriselna dinhmunin a zir loh vanga chhuak (family pension) mi 497 an awm a, mi 201 chu voluntary pension scheme hnuaia chhuak an ni. Mahni duh thu ngeia sor­kar hna chawlhsan (re­sign) mi 10 an awm bawk.