Rohluna'n tuialhthei zawnna hmun a tlawh Fur hmaa hna zualpui zo turin a hrilh
Geology & Mineral Resources (G&MR) minister H Rohluna chuan, Ningani khan Oil India Limited-in Maubuang rama hydrocarbons zawn hna an thawh mekna hmun a tlawh a, kumin fûr hmaa hna zualpui thawk zo turin a hrilh.
H Rohluna chuan, Oil India hotute chu an hnathawh tikhaihlak thei harsatna an tâwk a nih chuan a rang lama sorkar hriattir tura hrilhin, "In hnathawhte hi state sorkarin a endik leh zel dawn a ni," a ti a; Keifang rama Oil India hmalakna hmun panna, Seling-Keifang kawngpui dunga hmun ṭhenkhat lirthei lian chi kal theih lohna lai awm vanga harsatna pawh sutkian a nih tawh thu a sawi.
Parliamentary secretary (G&MR) Joseph Lalhimpuia pawhin thu sawiin, "Kan ramah hydrocarbons lâi chhuak ngei thei turin beiseina lian tak a awm a; company-te mamawh, hna thiam ṭhalai chherchhuah hi sorkar rilruah a awm daih tawh a ni," a ti.
Oil India hotute chuan, an hna tam ber chu mithiam bik chhawr ngai a nih avangin tualchhung mite thawh thei a la tlem tih an sawi a; an lei verhah hydrocarbons an laih chhuah hunah hralh theih tura ruahman a nih phawt chuan hna lak chungchang chu company thuneitute leh state sorkarin an la sawi dun tur thu G&MR hotute an hrilh.
Maubuang ram hi km. 4.5 verh tura ruahman a ni a, tunah hian km. 2.5 verh a ni tawh. Oil India geologist-te chuan km. 3.5 chin aṭang chuan hydrocarbons a awm leh awm loh hriat theih a nih tur thu an sawi.