News Lawrkhawm

AICS-ah seminar
Academy of Integra­ted Christian Studies (AICS) leh Senate of Serampore-te chuan January 27-30 chhung khan AICS campus-ah national seminar on human sexuality an buatsaih. Seminar-ah hian mi 60 vel an tel a, India ram hmun hrang hrang aṭanga mi thiam pasa­rihte thuziak zirho a ni.

Pandal sa tan
Ningani khan Presbyterian Kohhran Hmeichhe Inkhawmpui Lian vawi 46-na, March 6-8, 2015 chhunga Mamit GSA khelmuala neihna tur pandal sak ṭan a ni. Pandal hi a dung ft. 200 leh a vâng ft. 170-a sak a ni dawn a, mi 7,000 lenna tura ruahman a ni.

In kâng ral
Nimin chawhma dar 11:30 vel khan Serchhip district-a Khawlailung khuaah Vanlalina in, Assam type a kâng a, bungrua chuh hman lohin a kâng ral a, thi leh hliam an awm lo. Khawlailung YMA hruaitute chuan, Vanlallina in hi a fâl deuh avangin kângmei chhuak chu an hmu har deuh a, an hmuh chuan ṭhelh theih lohin a kâng nasa hman tawh niin an sawi.

MCAB meeting
Mizoram Cooperative Apex Bank (MCAB) chuan nimin khan an head office-ah Board of Directors meeting an nei a, chair­man T Lalmuanpuii’n a kaihruai. Meeting-ah hian, mimal leh sumdawng, bank-a kal hman lote’n awlsam zawka bank an dawr theih nana Pigmy Deposit Scheme an neih chu tihchangtlun lehzual an rel a ni.