Kawlphethaa kan intodelh theih nan theihtawp kan chhuah - PE Minister

Power & Electricity minister F Rodingliana chuan kawlphethaah Mizoram a intodelh theih nan theihtawp an chhuah thu sawiin, hydel project leh solar power hmanga intodelh tum a nih thu a sawi.

Vanglaini palai zawhna chhangin F Rodingliana chuan, hydel project pathum siam tum a nih thu sawiin, "Megawatt 24 pe chhuak thei tur Tlawng lui (Lungleng bul), mw. 150 pe chhuak thei tur Tuivai leh mw. 24 pe chhuak thei tur Tuirini-ahte hmalak tum a ni a, buaipui ngaite buaipui zel a ni," a ti.

PE Minister sawi danin, Tuirini aṭang hian mw. 40 pe chhuak thei hydel project siam theih a ni a, mahse mw. 24 pe chhuak thei tura siam tum a ni. DPR peih a ni tawh a, Council of Minister-in an remtih veleh tender chhuah a ni ang.

Tuivai luiah mw. 210 siam chhuak thei hydel project siam theih ni mah se, Manipur a chîm dawn avang leh ram a tihchhiat tam dawn avangin mw. 150 siam chhuak thei tura siam tum a ni. DPR siamna a rei tawh avangin DPR thar siam leh tura hmalak a ni.

Lungleng ram Tlawng luiah hydel project mw. 102 siam chhuah theih a ni a, mahse, mw. 24 chauh pe chhuak thei tura siam tum a ni. CWC-in DPR an zo tawh a, mahse, Mizoram chu lirnghing thlen mai theihna ram a nih avangin an siamṭha leh a, kuminah an siam zo hman mai thei.

PE Minister chuan, hydel project chu public private partnership (PPP)-a kalpui tum a nih thu sawiin, "Agreement kan uluk hle dawn. Tuirial Hydel Project ang maia ram zau tak pe si a, chan nei mang loa awm kan duh lo. Fimkhur takin company-te agreement kan ziahpui ang," a ti.

An ngenna angin sorkar laipuiin rooftop solar atan mimal hnenah subsidy a pek dawn thu sawiin Minister chuan, "Central sorkar hian 60% tumin, state sorkarin 20% a tum ang a, mimal hetiang duhte chuan 20% chauh an tum a ngai dawn. Limit a awm dawn lo a, a duh apiang tan lei thei a ni dawn. PE department-in a pawm distributor aṭanga leite hnenah chauh subsidy pek a ni ang," a ti.

F Rodingliana chuan, rooftop solar chu kilowatt 1-3 thleng tih theih a nih dawn thu sawiin, "Mahni duh ang zat lei mai tur a ni," a ti a; kawlphethaa intodelhna atana ṭangkai tur a nih avang leh a tlàwm dawn avangin lei ngei turin mipui a ngen a ni.