Eptu party pahnihin min beih rawn mek - B Lalchhanzova

ZPM Ṭhalai chuan nimin khan hruaitute tan Aizawlah political training an buatsaih a, minis­ter of state B Lalchhanzova leh Lalnghing­lova Hmar bakah, TBC Lalven­chhunga, MLA-te'n an hmanpui. B Lalchhanzova chuan, eptu party pahnihte'n ZPM an beih rawn mek thu a sawi.

Political training hi ZPM Ṭhalai president Jeje Lalpekhlua, MLA-in a kaihruai a; party chhunga inrêlbàwlna, media & publicity lam, nationalism leh motivational & youth development chungchangte an inzirtir a ni.

Minister B Lalchhanzova chuan, ZPM sorkarin sorkar hmasate kih hnawk an then fai mek thu sawiin, "Kan then faina kawngah hian opposition party pahnihte'n min beih rawn mek. Mahse, thil ṭha kan tihna kawngah hian kan chief minister Pu Lalduhoma'n min fuihna ṭhin angin huaisen takin kan kal zel dawn a ni," a ti

Supply minister ni bawk B Lalchhanzova chuan, "Tuna buhfai supplier kan thlan dan chungchangah hian minister tu mah kan inrawlh lo tih hi opposition-te ka hrilh duh a ni," a ti bawk.

TBC Lalvenchhunga pawhin thu sawiin, "ZPM-in kan tum bulpui ber chu mipui tana kan policy zawrh tihhlawhtlin a ni a, chumi hawi zawng chuan ZPM hi a kal mek zel." a ti a; ṭhalaite khawvel tiêng turin Hand Holding Policy hman an tum thu a sawi.