Sorkar kum kal mekah OMB hmangin Mizoram sorkarin vbc. 361 a pûk tawh

Mizoram sorkar chuan Open Market Borrowing (OMB) hmangin loan cheng vbc. 90 a pûk leh a, sorkar kum kal mek 2024-25 ah OMB hmangin cheng nuai 361 a pûk tawh.

Vanglaini thu dawn danin, Mizoram sorkarin OMB hmanga sum a pûkna tura tih tur ṭulte chu Reserve Bank of India (RBI)-in an buaipui a; OMB hmanga Mizoram sorkarin sum pûk tur a zawn thu July 12, 2024 khan RBI-in a tichhuak.

OMB hmanga sum pûk a nih theih nan RBI-in state sorkar tan sum pûktir thei tur a zawng a, financial institution-te'n an chháng ṭhin. Mizoram sorkar sum pûk tur RBI chuan June 16, Thawhlehni khan a tifel a ni.

OMB hmanga sum pûk chu kum khatah a pung vawi hnih rulh tur a ni a, kum 10-15 velah sum pûk zawng zawng rulh tlâk a ngai a, a punna chu 7-8% vel a ni.

Sorkar sum kum kal mekah OMB hmanga sum pûk tur zata ruahman chu cheng vbc. 1,170 a ni a, sorkar kum liam ta aiin cheng vbc. 30-in a tlem zawk. Kum 2023-24 khan cheng vbc. 1,200 pûk tura ruahman a ni.

Financial year 2024-25 budget pharh zawhah chief minister Lalduhoma, Finance enkawltu chuan, kum 2024-25 ah chuan kum 2023-24 aia tlem zawk pûk tura an dah thu a sawi rualin, pûk tur zat ruahman chu pûk ngei ngei tur tihna a nih loh thu a sawi.

Mizoram sorkar chuan May 2024 tàwp lam khan kumin sorkar kum kal meka a ṭum khatna atan OMB hmangin cheng vbc. 200 a lo pûk tawh a; June thlaah cheng vbc. 71 pûk lehin, a ṭum thumna atan cheng vbc. 90 a pûk leh a ni.