CM-in zilhhauh an ngaihna laiah thurâwn pe vat turin VUC a ngen
ZPM Legislature Party leader Lalduhoma, chief minister chuan, ro an rèl danah tih sual palhte an nei thei tih sawiin, chu'ngah chuan ZPM Val Upa Council (VUC) an mamawh thu a sawi a; zilhhauh an ngaihnaah rang taka thuràwn pe turin VUC-te a ngen.
ZPM Legislature Party, Val Upa Council leh ZPM General Headquarters elected office bearer-te chu nimin khan Chief Minister's Office conference room-ah an inhmukhawm a; ZPM party kal zel dan tur leh sorkar inrêlbàwlna hmasawn zel dan tur an sawiho a ni.
CM Lalduhoma chuan, VUC-in fîm takin sorkar hotute an uap tlat tih sawiin, "Kan tlân chak lutuk tur min veng a, kan kal muang lutuk tur min nawr a, kan bána min kaih tlat avangin ZPM party tan an hlu hle. Kan rorel dan leh thu kan tihtluknaahte 100%-in kan ti fuh vek sêng lo mai thei, tih sual palhte pawh kan nei ve ang, chu'ngah chuan kan mamawh tur chu VUC hi in ni. Zilhhauh kan ngaih hunah rang takin rawn che u la, in thurâwn hi engtik lai pawhin kan mamawh reng a ni," a ti.
ZPM chuan hun harsa tak paltlangin an inhrual mûm tih sawiin Lalduhoma chuan, "Kan party kal chhoh danah tawrhchhel a ngai ṭhin hle. Pathianin a hun takah hna a thawk a, mi tam takin sorkarna siam thei loa ṭîlṭiak leh mai tura min ngaih laiin party chhungkua inhmangaih tawn tak kan lo ni a, kan taimak leh induhsak tawn rah kan seng a ni," a ti a; mipui khawngaihna zarah sorkarna an siam thu a sawi.
ZPM president Lalliansawta chuan, ZPM chu eiru lo tura intiam an nih thu sawiin, "Kan eiru lo mai ni loin, kan hmuh phâkah eirûkna a awm lohna turin Pathian hre reng chunga kan kal a ngai. Mipui hmaa kan intiamna hi Pathian hmaa kan intiamna a ni tih hre reng ila, Pathian ṭihna nen ro rel zel turin kan insáwm nawn leh a ni," a ti.
ZPM president Lalliansawta chuan, Pathian leh mipui zarah ZPM kutah rorelna a tla tih sawiin, "Kan chungah mipuiin rinna an nghat a, mipui hi kan tibeidawng ve thiang lo. Party ve ta chu lehlam páwlte'n min rawn bei ve ta malh malh a, dawhthei takin kan thil tih hmangin kan chhang zel dawn a ni," a ti a; hnathawh ṭhat hmanga an chhàn lêt theih nan an hnathawhte chu ram leh hnam ro tling a ni tur a ni tih a sawi.
Ṭhutkhawm kaihruaitu Lal Fakzuala, VUC chairman chuan, sorkar hotute'n ram an kaihhruai dante ngun taka an lo thlir ṭhin thu sawiin, "Sorkar hmasate'n ram an kaihhruai danah duhkhawp loh lai kan neihte leh kan lo sawisel ṭhinte chingfel tura tun sorkara kan beiseinate sawihona hun kan nei leh thei hi a lawmawm. ZPM ministry hi party sorkar ni lo a, mipui sorkar dik tak din tura beisei kan ni a, chumi lam hawia kal zel tur chuan VUC hian kan beisei reng che u a ni," a ti.
VUC Chairman chuan, "Sorkar inrêlbàwlnaah direct takin inrawlh thei lo mah ila, thurâwn pe tur erawh chuan thûk takin kan inrawlh zel dawn. Party leh sorkarin tih dik loh an neih pawha khalh ngil tur leh thurawn pe turin theihtawp chhuahin in kaiza kan rawn veng zel dawn. Sorkar hmasa tih angte tih ve zel a rem dawn lo a, an tih ngam loh thil ṭha erawh huaisen taka kan tih a ṭul fo ang, dâwih tak leh hlauh nei lutuka ram hruai hi hmasawn lohna pakhat a ni a, mi dang ngaichâng loa thu duh lutuk pawh thil ṭha a ni lo," a ti a; ZPM MLA-te chu Bible leh Pathian ráwn tam lehzual turin a chah.
Ṭhutkhawmah hian ZPM kaihhruai sorkar hmalak tawhnate an thlir let a, rilrua awmte an sawi chhuah bakah an infuih a; hma lam huna party leh sorkar thâ tihchak zel dan turte leh kal zel dan turte an sawiho a ni.