ZORO-in UNO Geneva inkhawmpuia an chêt dante press mite an hrilhfiah

Zo Reunification Organisation (ZORO) hruaitute chuan nimin khan Aizawl Press Club-ah thuthar thehdarhtute an kâwm a; tun hnaia UN Expert Mechanism on the Rights of Indigenous Peoples Session vawi 17-na neiha palai an intirh dan leh hun an hman dante an sawi.

UN Expert Mecha-nism on the Rights of Indigenous Peoples Session hi July 8-12, July chhung khan Switzerland khawpui Geneva-ah neih a ni a; ZORO aiawhin ZORO Western Zone president Lalnunfela Chawngthu leh KH Lalruatpuii, Serchhip-te an tel a ni.

Lalnunfela Chawngthu chuan, UNO-ah ram 194 an inziak lut tih sawiin, "Indigenous people nei ram 90 an awm a, tun UN inkhawmpuiah hian indigenous people nei ram aṭangin palai 730 kan kal. Thusawina hun hi minute 3 pek kan ni a, duh angin thu a sawi hman loh. Zo fate'n India, Myanmar leh Bangladesh ram chhunga harsatna kan tawhte sawi chhuah kan duh si a, hun a tlem hle a ni," a ti.

ZORO chu UNO hmunpui Switzerland-ah an hre hle nia sawiin Lalnunfela chuan, "ZORO palai ka nih angin min lo ngai pawimawh hle. Zo fate tan ZORO thil tum hi a pawimawh em em a, khawi hmunah pawh awm ila kan ngaih pawimawh a ngai. UNO-a kan palai nihpuite chuan Zo fate hi in ṭangrual tâwk lo a, ṭangrual u la chuan dinchhuah theihna chance ṭha tak in nei a, in chanvo hi in ngaihsak lo a ni, an ti," a ti a; Mizote'n an chanvo an ngaihsak lehzual a ngaih thu a sawi.

Lalnunfela Chawngthu chuan, UNO-a a palaipuite'n thu an hrilh pawimawh a tih em em sawiin, "Zo fate hi Hindu, Mosolman leh Buddhist inkarah Kristian niin in chêng a, sakhaw lian pui pui pathumin an hual vel che u a, in tan chêt vel a harsa dawn. Zo fate tan chuan rorelna pakhat a awm a, zalenna neih in mamawh hle a ni min ti," a ti bawk.

ZORO press conference hi an president R Sangkawia'n a kaihruai a ni.