Oil palm aṭanga tél herna khawl bun thar enchhin a ni

Mamit District Cooperation office bultumin July 16, Thawhlehni khan Tuidam khuaa Tuidam Oil Palm Farmer Cooperative Society Ltd.-in oil palm aṭanga ei siamna tél (cooking oil) herna khawl an bun thar chu a taka hman chhin (trial run) a ni a; Mamita IPR department hotute leh MJA member-te'n an telpui.

Mamit district cooperative officer Lalthangfala tarlan danin, oil palm herna khawl hian ni khatah oil palm quintal 10 a her thei a, ni khatah oil palm hriak litre 200 leh oil palm cake kg. 300 a her chhuak thei. Khawl bunna leh a in sakna atan cheng nuai 22.50 hman a ni.

Mamit district-ah hian cooperative society 115 an awm mek a; khawl bun thar hi hman a nih hunah chuan oil palm chíngtute'n tuna oil palm an hralhna chu a lêt thuma tam a nih theih beisei a ni.