Minister-in MHIP jubilee lawm a hmanpui

MHIP, Tuikual South branch chuan an kum 50-na, golden jubilee nimin khan an veng YMA Hall-ah an lawm a, bialtu MLA Lalnghinglova Hmar, minister of state-in a hmanpui.

Jubilee lawmna inkhawm hi Tuikual South MHIP president H Lalawmpuii'n a kaihruai a; an branch huam chhunga MHIP member kum 70 chung lam mi 50-te hnenah thilpek an hlan a, member thi mi 17 sûnna hun an hmang bawk.

Khuallian Lalnghinglova Hmar chuan, member 1,617 awmna MHIP, Tuikual South branch hmalaknain khawtlang tihhmasawnna leh siamṭhatnaah awmze thui tak a neih a rin thu sawiin, MHIP thuthlungte chu mi dang tana entawn tlak ni thei tur khawpa a taka nunpuitu nih tum turin a chah a, "Chhungkua leh khawtlang tihhmasawnna kawngah nu berte mawhphurhna hi a pawimawh berte zinga mi a ni," a ti.

Chhungkaw páwn lama hlimna ûm ṭhinnain chhungkua a tihchhiat ṭhin thu sawiin Minister chuan, "Chhungkuaa hun hmanho tam leh inpawhna ṭha neih a pawimawh. Zirna, hnathawhna leh inelna hrang hrangah hmeichhiate hotu leh hmahruaitu an ni nual tawh a, ram roreltu ni tur pawhin mipuiin hmeichhiaah rinna thui tak an nghat tawh," a ti a; chhungkua leh khawtlang tihmasawntu nih tum zel tur leh an pawimawhnate hre chunga hma lam pan zel turin kal khawmte a fuih.

Excise Minister chuan, ruihhlo chu ram leh hnam hmelma, chhungkua leh khawtlang tihrehawm theitu a nih thu sawiin, "Ruihhlo donaah khawtlang, kohhran leh sorkar thawhhona a pawimawh a, ruihhlo ṭhat lohna inzirtirna mai piah lamah, ruihhlo bâwiha tâng mekte chhan chhuak turin a taka pên chhuah a ṭul," a ti a; ruihhlo donaa thawhpuiah tlawmngai pawl leh kohhran hruaitute a sáwm a ni.