KHAWTHLIR

PYD-in thisen pe

Pentecostal Youth Department (Mizoram), Chawlhhmun Bial chuan nimin khan Synod Hospital tan thisen unit 46 an pe a, petute mipa 29 leh hmeichhia 17an ni.

Mamit DC thar

Mamit district deputy commissioner thar Jacob Lalawmpuia, MCS chuan July 16, Thawhlehni khan Mamit bawrhsap hna a zawm a, bawrhsap kalchhuak VL Remliana hnen aṭangin mawhphurhna a la. Jacob Lalawmpuia hi Kolkata Mizoram House joint resident commissioner aṭangin Mamit DC tura ruat a ni.

Current man vangin thi

Beckham Lalhmunsanga (16) s/o Laldinliana, Bulfekzawl, Champhai district chu Aizawla a inhlawhnaah electric current-in a man avangin July 16, Thawhlehni khan a thi. Beckham Lalhmunsanga hi in saknaah inhlawhin, a ṭhianpa nen in chung lama iron rod an hlang tur chu electric line an hawlh palh a, current-in a man. Damdawi-in panpui ni mah se, chhan theih a ni lo. A ṭhianpa pawh current-in a man a, a hliam a ni.

SHG-te kâwm

Rural Development minister Prof. Lalnilawma chuan July 16, Thawhlehni khan video conferencing kaltlangin Mizoram State Rural Livelihood Mission (MzSRLM) hnuaia RD block 28-a self help group (SHG) member-te a kâwm. SHG tihchangtlun zel dan tur leh nasa zawka SHG member-te'n hma an lak theih dan turte sawiho a ni a; Mizoramah SHG 10,425 din tawh niin, member 81,829 an awm mek tih tarlan a ni.

Rangva pe

Central YMA hruaitute chuan nimin zing khan an treasurer Fabian Lalfakawma leh finance secretary MS Ralte hoin ruihhlo ngaite enkawlna hmun Operation Kingdom Ministry (OKM), Phunchawng an tlawh a, an hmun hungna tur rangva bundle 10 an pe. OKM-ah hian ruihhlo ngai mi 300 chuang an awm mek a ni.