Blood processing fee Rs. 60,57,550 hmu tawh Private hospital-te'n Rs 30,58,300 an bâ
Mizoram sorkarin thisen dawngtute aṭanga senso phuhrûkna tur, blood processing fee a lak aṭanga April 31, 2016 thleng khan Rs. 60,57,550 a hmu tawh. Aizawla private hospital bik aṭangin Rs. 27,81,200 hmu tawhin, private hospital-te'n an batsak zat chu Rs. 30,58,300 a ni.
RTI Act hmanga zawhna Hospital & Medical Education (HME) department-in a chhan danin, Aizawl Civil Hospital (ACH) hian blood processing fee hi ACH bika thisen hmangtute aṭangin Rs. 32,76,350 an hmu tawh.
Sorkarin thisen sawngbawlna senso an lak aṭanga April 31, 2016 thleng khan ACH hian an damdawi-in bika hman turin thisen unit 8,197 a pe chhuak tawh a; chu chu thisen unit khat Rs. 550-a chhûtin, Rs. 45,08,350 hmu tur an ni. Mahse, RSBY leh BPL-a awm te, nu nau pai leh naupang kum khat hnuai lam te, thalasemia, haemophilia leh aplastic anaemia natna veite leh rîkrum thila thisen pek ngaite a thlawna pek an nih avangin Rs. 12,32,000 hû a thlawnin an pe chhuak a ni.
Blood processing fee lak tirh aṭanga April 31, 2016 thlenga ACH-in private hospital-a thisen a pek chhuah tawh zat chu unit 10,782 a ni a, chuta ṭang chuan Rs. 58,41,300 hmu tur an nih laiin, Rs. 27,81,200 an hmu tawh a, Rs. 30,58,300 an batsak mek thung.
Aizawla private hospital zinga ACH aṭanga thisen hmang tam ber chu Aizawl Hospital & Research Centre an ni a, April 31, 2016 thleng khan unit 4,006 an la tawh. Aizawl Hospital hian ACH-ah hian Rs. 21,78,150 pek tur an nei a, Rs. 5,19,650 pe tawhin, Rs. 16,58,500 an la bá a; kum khat chhung (April 2015 aṭangin) an la pe leh lo.
ACH aṭanga thisen la tam ber dawttu chu New Life Hospital a ni a, unit 2,010 an la tawh. Thisen an lak tawhte aṭangin ACH-ah Rs. 10,85,000 pe tur an ni a, Rs. 4,99,800 pe tawhin, Rs. 5,85,200 an la bá.
April 31, 2016 thlenga thisen unit 138 la tawhtu Bethesda Hospital chuan ACH-ah bill (Rs. 74,950) an la pe lo.
Aizawl Civil Hospital hotute chuan, thisen sawngbawlna senso phuhrûkna tur lak hi February 2015 aṭangin unit khatah Rs. 550 a ni a, a hma chuan Rs. 500 a ni tih an sawi.
ACH hotute chuan, private hospital-te'n ACH Blood Bank aṭanga thisen an lakin, thisen sawngbawl man sorkarin a lak an pe ṭha lo chu an harsatna pakhat a nih thu an sawi a; private hospital-te chuan an damlote aṭangin ACH aṭanga thisen an lakna senso chu an bill tel tho avangin tun aiin ngai pawimawh se an duh thu leh, chu chuan blood donation camp atana sum lama an harsatna pawh an tihziaawm tur thu an sawi.
Vanglaini palai zawhna chhangin, ACH hotute chuan, private hospital-te chu an bá pe tura phût nan thisen pek loh mai chi a nih loh thu an sawi a, "Mihring nunna khawih thil a ni a, thisen pe chhuak lo duh ila, damloin a thih phah theih avangin thil tih chi a ni lo," an ti.
Aizawla private hospital-te thisen lak man dinhmun
Damdawi-in Pek tur zat Pek tawh Bat zat
Grace Nursing Home Rs. 5,84,750 Rs. 4,46,150 Rs. 1,38,600
Nazareth Hospital, Chaltlang Rs. 5,17,950 Rs. 4,69,000 Rs. 48,950
Nazareth Hospital, Ramhlun N Rs. 1,14,400 Rs. 89,650 Rs. 24,750
Besthesda Hospital Rs. 74,950 Nil Rs. 74,950
Adventist Hospital Rs. 99,750 Rs. 73,350 Rs. 24,600
New Life Hospital Rs. 10,85,000 Rs. 4,99,800 Rs. 5,85,200
Vaivenga Hospital Rs. 2,42,550 Rs. 1,78,050 Rs. 64,500
Synod Hospital Rs. 10,800 Rs. 4,200 Rs. 6,600
Aizawl Hospital & RC Rs. 21,78,150 Rs. 5,19,650 Rs. 16,58,500
Greenwood Hospital Rs. 6,23,550 Rs. 3,42,600 Rs. 2,80,950
Alpha Hospital Rs. 86,300 Rs. 67,600 Rs. 18,700
Bethany Hospital Rs. 1,09,450 Rs. 48,400 Rs. 61,050
BN Hospital Rs. 1,13,700 Rs. 42,750 Rs. 70,950
TOTAL Rs. 58,41,300 Rs. 27,81,200 Rs. 30,58,300