Aizawl dáiah auto-rickshaw tlântir tum a ni

Mizoram sorkar chuan Aizawl khawpui daifemah auto-rickshaw tlantir a tum a, tunah hian Transport department lamin ruahmanna an siam mek.

Transport director R Rem-mawia'n Vanglaini zawhna chhanga a sawi danin, sorkar hotute duh dan angin, Transport department chuan Aizawl khawpui daifem hmun ṭhenkhatah auto-rickshaw tlantir tumin an buaipui mek a; ruahmanna an peih hnuah State Transport Authority-ah pawmpui turin an thehlut ang.

R Remmawia chuan, auto-rickshaw chu tlantir a nih pawhin, khawpui chhunga traffic tibuai lo turin khawpui chhungah tlan luh phal a nih dawn loh thu a sawi.

Ruahman dan chuan, Durtlang, Selesih leh Sihphir velah tlantir tum a ni a, mahse Aizawl lamah Durtlang Leitan pêl lo tura tih a ni.

Aizawl chhim lam, Melthum lamah tlantir tura ruahman chhin a ni a, khawpui chhung lam hawiin Saikhamakâwn pêl lo tura tih a ni. Aizawl tlak lam, Mizoram University kawng lamah chuan Chhangurkâwn pêl lo tura tih a ni thung.

May 20, 2016-a Congress Bha-van-a inkhawmah chief minister Lal Thanhawla chuan Aizawl khawpui daifema tlân turin auto-rickshaw permit pek chhuah a duh thu leh, chu chu sorkara rawt a tum thu a lo sawi tawh a; sorkar hotute'n an remtih chuan permit pek chhuah nghal mai theih a nih thu a sawi.

June 17, 2016-a Mizo High School Field, Zarkawta CM Lal Thanhawla'n NLUP kaltlanga auto-rickshaw a semnaah pawh, Aizawl South-III bial chhunga mi pariat hnenah pek tel a ni.