Aizawla chenna in nei lote tana in sak Luah khat zo tur diltu an awm lo

Basic Services to Urban Poor (BSUP) hnuaia chenna in nei lote luah tura in sak luah diltute chu an dinhmun enfiah a ni dawn a, in luah diltu hi in sak zat aiin an tlem zawk.

In sak hna thawktu, UDPA department-a director Zorammmuana hnen aṭanga thu dawn danin, BUSP hnuaiah Durtlang, Rangvamual, Edenthar leh Lawipu-ahte chenna in nei lote luah atan in 1,096 sak a ni a, in luah diltu chu 1,006 an ni. Lawipu-ah chhungkaw 408, Durtlangah chhungkaw 320, Rangvamual leh Edentharah chhungkaw 368 awm theihna tur sak a ni.

In luah dil duhte tan March 8, 2016 aṭang khan dilna hun hawn a ni a, hun tiam chhungin mi 1,006-in dilna an thehlut. In luah diltute chu an dinhmun enfiah vek a ni dawn a, danin a phût anga tlingte chuan in an luah thei ang.

Zawhna chhangin Zorammuana chuan, in chu peih thawkhat a ni tawh tih sawiin, "Tui, kawlphetha leh in luahtute mamawh dangte chu an luah hunah dah a ni ang. Luahtu an awm hmaa dah a nih chuan hmanruate a bothlau a hlauhawm. In luahtute mamawh dahna turin sum a awm vek tawh a ni," a ti a; in luah turte thlan an nih hunah inte chu a nih tur anga peih hman an inbeisei thu a sawi.

BSUP hnuaia luah dil turte chu India khua leh tui, chhungkaw harsa, Aizawl khawpuia kum nga cheng tawh (June 2011 hma lam aṭanga chhiar tur) leh in leh lo nei lo an ni tur a ni. Aizawl khawpuia kum nga an chen leh chen loh finfiahna atan local council aṭanga hriatpuina neih a ngai.