KHAWTHLIR

Olympic Day pual

Nimin khan Kawnpuiah Olympic Day pualin Hockey Mizoram chuan hockey exhibition match an buatsaih a, Mizoram State Olympic Association vice president leh Hockey Mizoram president Hmingdailova Khiangte bakah Kolasib DC H Lalengmawia leh High Performance Indian Hockey Coach BJ Kariappa ten an hmanpui. June 23 hi Olympic Day a ni a, he mi ni hian MOA chuan general body meeting an hmang ang.

Saphu káwr man

Mizoram police-te chuan June 20, 2016 khan Seling dáiah saphu kâwr kg. 60 an man a, a neitua puh Lalpianga (37) s/o Khualhluma, Zokhawthar nia insawi an man bawk. Saphu kâwr an man hi Aizawla an hralhna rate ang chuan Rs. 9,00,000 hû a ni.

PMEGP zirho

Industries department chuan nimin khan an pisaah PMEGP zirhona an buatsaih a; PMEGP margin money scheme hnuaia loan dil tumte'n an hriat tur thil pawimawhte leh ṭanpui an ngaihna lai scheme guideline siam thar chungchang zirho a ni.

Pass lawm

Tlungvel Higher Secondar School chuan nimin khan an sikulah HSSLC 2016-a pass percentage 100% an neih lawmna an buatsaih a, School Education minister H Rohluna'n a hmanpui. Tlungvel HSS hian HSSLC-ah candidate 36 an nei a, an pass
vek a ni.

MUCO Assembly

MUCO Bank Ltd. chuan vawiin chawhma dar 11 hian Synod Conference Centre-ah General Assembly an hmang dawn a; share holder-te kal vek turin an inngen.

Squad meeting

Lawngtlai District Anti Tobacco Squad chuan nimin khan Lawngtlai DC conference hall-ah addl. DC R Lalsangluaia hoin squad meeting an nei a; Lungtian,
Vaṭhuampui, Ugulsury, Mámpui leh Chawnhù khuate chu 'Tobacco Free Village' a puan theih tura hmalak an rel.